Saturday, November 19, 2011

Urlawk Zan

Ni 14.11.11 zana Branch Committee chuan kumin Urlawk zana KTP ten hun kan hman dan tur a rel a, an thurel tlangpui chu hetiang hi a ni e -

 A hun      :  24th Dec.2011,  zan dar 9:00
 A hmun   :  Republic Veng Community Hall chung
 Hosts      :  Tv. C. Malsawmtluanga, Br.C/M  leh  Nl. M.S Dawngkimi Ralte Br.C/M
 Hunserh  :  Pu R. Lalmalsawma, Leader
#  Branch pawn lam atangin heng mite hi zai tura sawm nise - The Chosen, Drob Doubt, Henry Varte leh a thiante, Dr.Luke (midang remchan loh chuan), Judith Lalremruati, Margaret Malsawmzuali, Rosy K.Remsangpuii, Zoramchhani, Vanlalruatfeli (Dr.Luke remchan loh chuan). Heng zai tura kan sawmte hnenah hian lawmthu sawina thilpek atan a mimalin Rs. 500/- theuha pek nise kan ti.
#  Kan Branch atangin heng mite hi zai / item nei se kan ti - Pu Lalremsanga, Pu Kananmawia, CYS Beat Group leh Worship dance.
#  House Band siam a ni a, member te chu - Tv. Lalthazuala (Convener), Tv. C. Lalthlengliana, Tv. Zomuanpuia Sailo, Tv. Rosangmawia, Tv. Freddy Zomuansanga, Tv. K. Lalrambuatsaiha, Tv. Lalzidinga.
#  Christmas countdown neih nise.
#  Tanpuina thawhlawm bawm hun nise.
#  Coffee leh a hmeh buatsaih nise (in leh ei tura chhawp reng), Refreshment Sub-Commtt. ten lo buaipui se.
#  Stage siam nise, hemi atan hian a remchan chuan Mizoram Wrestling Association structure hawh nise.
#  Light system Rs. 3,000/- man hawh nise, SEP Sub-Commtt. ten lo buaipui se.
#  Kan hun hmanna tur zar phui deuh nan samiana hawh nise.
#  Sound system hi SEP Sub-Commtt.-in buaipuiin, hawh belh a tul a nih chuan lo ngaihtuah se kan ti.
#  Stage chei dan turah CRF & Decoration Sub-Commtt. in hma lo la se.
#  Section VII YMA thutthleng hawh dil nise.
#  Security lama min pui turin Section VI YMA leh Section VII YMA te ngen nise.
#  Kan hun hman tur puanzarna atan leh a zau thei anga mi sawm nan poster tar nise.
#  Kan hun hman min cover sak turin Zonet Cable TV leh Pu Biakchhawna, LPS Sub-operator te ngen nise.
#  Official-a thlalak (still) lam lo kutken turin Tv. R. Lalrinawma, Luka Gr. kan ruat.

Monday, November 14, 2011

Branch KTP Sport 2011 Result

Republic Veng Branch KTP chuan kumin October thla chawhnu lam khan Branch Sport 2011 kan nei a. Ni 22.10.11 (Inrinni) khan AR Lammual ah outdoor items hrang hrangah Group ten hlimawm takin inelna kan nei a. Ni 28.10.11 (Zirtawp) zanah Community Hall ah indoor items hrang hrangah inelna nei lehin, Ni 31.10.11 (Thawhtan) zan khan Kohhran Hall ah Sport kharna kan nei. Inelna hrang hranga result chu hetiang hi a ni e -
Football
1st     :     Matthaia Gr.
2nd    :     Luka Gr.
3rd     :     Marka Gr. & Johana Gr.

Poisonball
1st     :     Marka Gr.
2nd    :     Matthaia Gr.
3rd     :     Luka Gr. & Johana Gr.

Mixed Relay Race
1st     :     Matthaia Gr.
2nd    :     Luka Gr.
3rd     :     Marka Gr. & Johana Gr.

Penalty Shoot-out
1st     :     Johana Gr.
2nd    :     Luka Gr.
3rd     :     Matthaia Gr. & Marka Gr.

In-khawngkhawbai-um
1st     :     Marka Gr.
2nd    :     Johana Gr.
3rd     :     Matthaia Gr. & Luka Gr.

Table Tennis
1st     :     Johana Gr.
2nd    :     Marka Gr.
3rd     :     Matthaia Gr. & Luka Gr.

Chinese checker
1st     :     Luka Gr.
2nd    :     Matthaia Gr.
3rd     :     Marka Gr. & Johana Gr.

Carom board
1st     :     Johana Gr.
2nd    :     Luka Gr.
3rd     :     Matthaia Gr. & Marka Gr.

Draught board
1st     :     Matthaia Gr.
2nd    :     Marka Gr.
3rd     :     Luka Gr. & Johana Gr.

Chess
1st     :     Johana Gr.
2nd    :     Marka Gr.
3rd     :     Matthaia Gr. & Luka Gr.

Baltin chhunga ball vawm
1st     :     Luka Gr.
2nd    :     Marka Gr.
3rd     :     Matthaia Gr. & Johana Gr.

Gymnastic
1st     :     Matthaia Gr.
2nd    :     Luka Gr.
3rd     :     Marka Gr. & Johana Gr.

Boruak siam (Fans neih that)
1st     :     Johana Gr.
2nd    :     Marka Gr.
3rd     :     Matthaia Gr. & Luka Gr.

Inchhiarna
1st     :     Matthaia Gr.
2nd    :     Johana Gr.
3rd     :     Luka Gr. & Marka Gr.

Final Result
1st (450 points)    :  Matthaia Gr.  &  Johana Gr.
2nd (390 points)   :  Marka Gr.  &  Luka Gr.


Sunday, November 13, 2011

Kan lehkhathawn dawn

He blog kaltlang hian kan Branch hruaitu hlui hnen atangin lehkha kan dawng a, a ngai ngaiin kan han post nghal e -

To,
        The Secretary
        KTP Republic Veng Branch

Subj :  Lawmpuina

Republic Veng KTP Kan Lalpa Isua Krista hmingin chibai ka buk a che u. Hun te an lo in herliam zela, kan vanglainite pawh an lo her liampui ve zel bawk a, KTP pawh a din tirh atangin Hruaitu fel tak tak ten an lo hruai chho tawh a. Hruaitu hlui aia fel leh zei te remhriatnain KTP kalphung leh a chet vel dan pawh a lo danglamin " Hmana kan tih dan chuan" a tih ngawt theih thawh awm lo ve.

Internet atangin tunah chuan Rawngbawlna chanchin leh kan chet vel dan te kan lo hmu thei ta hi a lawmawm hlein ka hria. Kohhran tan pawh vanneihna ropui tak a ni awm e. Hetiang dinhmuna kan lo ding thei hi Hruaitute inpekna leh Member te nena thawh hona tha atanga chhuak a ni ngei ang le.

Kumin min liampui takah chuan kan khawhawi pawh a lo zim ve telh telh a, KTP rawngbawlna kan thatlai chhung zawnga kan vah vaihpui pawh a chanchin ka hre hlei thei lo chu a ni ta ber e. Tuna thalai duh tak te u, A rawng kan bawl Lal Isua hi a lo la kallo anih chuan in la tawng ve ngei ang le.

Hruaitute hnung zuia ka lo tel ve tawhna Republic Veng Branch KTP Hruaitute leh memberte ni mek te duhsakna ka hlan e. Inthawhrimna Lalpan malsawm che u rawh se.

C. Lalchhuankima
Republic Venghlun
Ex KTP

Sermon (Thalai Aw, 13th Nov.2011 issue)

Kawng dik chu kawhhmuh rawh u!
“Naupang chu a kalna awm kawngah chuan zirtir ula, a upat hun pawhin a thlah lo vang.” (Thufingte 22:6)
Danny Lalremmawia, Fin. Secy, Branch KTP

He khawvel kan khualzinna ram, kan dam chhung rei loteah hian mihringte hian mamawh, duh leh it zawng kan ngah em em mai a. Chumi nei tur chuan nasa takin kan bei thin a. Khawvela kan cham chhunga ‘ro’ ni a kan hriat te hian mawina a nei rei lo a, hlutna a nei rei hek lo. Amaherawhchu, Lalpa laka kan rochan fanaute hi chu kan thih hnu pawha vanrama kan chhawm theih te an ni a. Dam chhung tawite mawina hian kan ‘rohlu’ dik tak te hlutna hi min hmuh hmaihtir thin si a. Chatuana fate hamthatna tur ngaihthah khawpin he khawvel thilah hian nu leh pa leh an chhungte hian kan ngaihtuahna leh kan rilru kan seng nasa hle mai! Chatuan hremna an pumpelh theihna tur hian nu leh pa leh puitlingte hian tihtur kan ngahin, kan kovah thil tam tak a innghat a ni.

Hna pawimawh i ngaihsak ang :  Nu leh pa leh puitling ten hna pawimawh zawk Lalpa kawng zawh tura zirtir tak tak si lova thil dang an ngaihpawimawhna zawk hian sualna a tipunlun nasa em em mai a. Engvangin nge tunlaiah sualna a tam tawh kan tih leh mai thin? Sualna tirem turin sual kan haw tawk tak tak tawh lo a, kan in tha en liam vel mai mai a. Miin sual a tih a, pawi a khawihin a tuartu kan nih loh chuan pawi tihna kan nei tawh lo a. 'Tu fa nge?' 'Tunge a chhungte?'  “A chhungte an va khawngaihthlak ve,” kan ti a, kan duhtawk ta der mai.

Kan naupan lai chuan thilsual kan tihin puitling, kan chhungte ni miah lo pawhin min hmuh chuan, en liam mai mai lovin, min kamkhat a, ti tawh lo turin min hrilh hram thin kha a ni a. A upat hun pawha a thlah loh tur, a kalna awm kawnga naupangte zirtir hi nu leh pa leh puitling te hian sualna pung zel tur danna a ni tih hriain, hna pawimawhah neiin i ngaihthah lo ang u.

Thununna : Thing chu kawih kul dan zelin a thang a, amaherawhchu, a puitlin hnu chuan theihtawp pawhin kuai mah ila awmzia a nei tawh lo. Kan kawih lai kan thlah rualin a ngai angin a awm leh nghal ang. Chutiang chiah chuan mihringte pawh hi naupan laia inthununna tha (Pathian duhzawng) hian nun awmze nei a hring chhuak thin. ‘Naupang thinlungah chuan atna a bet tlat a; mahse thununna tiangin hla takah a hnawt kiang ang’ (Thuf 22:15). ‘Tiang hmang duh lo chuan fa a hua a ni, a hmangaihna erawh chuan a thunun chawt thin’ (Thuf 13:24).

Thununnain finna kan zirtir ang a, kan hmangaihna lantir nan kan fate, kan naute chu kan thunun dawn a ni. Sunday School kal tluan chhuak fel lo hi a awm theih em? Zirlai zirtir bakah thununna nena School ropui tak hi inkaihhruai anih loh chuan Pathian thuawihna kan tlachham telh telh ang a, kan kristianna hi a hnungtawlh zawngin a kal dawn a ni. Zirtirtute pawhin naupangte an thlarau nun kan ngaih pawimawh hi a tul hle a ni. Khawtlanga misual ni a kan hriat kha Sunday School a kan zirtir thin nise la, zahthlak tihna chang kan hria ang em? Sunday School zirtirtute leh nu leh pa te, upa zawkte kovah hian naupangte hmalam hun tur hi a innghat thui hle a ni. “I fate thunun la tichuan Seol ata a nunna i chhanchhuak ang” tih a ni si a.

Tuh rah seng :  Galatia 6:7-ah “Miin a theh apiang, chumi vek chu a seng bawk dawn si a” tih kan hmu a. Kan rama sualna pung nasa kan tihte hi enge a chhan ni thei ang? Kan theh aia tha tumahin kan seng dawn si lova, chuvangin sualna punna chhan chu a thehtute hi an ni mai lo maw? Tuna naupangte hi nakina kan kohhran hruaitu, ram hruaitu la ni turte an ni. Nu leh pa leh puitlingte hi entawn tlakin awm ila, fel tak leh dik taka naupangte seilentir hi kan bat a ni.

Bank-ah nakina hman tur pawisa kan dahin kan thla a muang viau a ni thei, mahse chumi ai chuan kan fate, kan naute nuna Pathian thu kan dah luh hian hlimna nasa zawk, nakina kan tana hlimna leh lawmna nasa zawk, sum leh pai, lei hausakna te sawi hleih theih loh chu kan nei zawk dawn a ni.

Pathianin puithiam Elia chhungte a hrem chhan chu a faten Pathian an sawichhiatna sual chu hre reng pawha a khap loh vang a ni. Lalpa laka kan rochan fanaute hi chatuana nunna an neih theihna tura kaihhruai leh enkawl hi Lalpa hna a ni tih hre thar zelin, kan duh loh rah kan seng loh nan naupangte kawng dik kawhhmuh ila, Lalpa tana hna tha tak, keimahni tana malsawmna ni bawk si kan thawk a lo ni reng dawn a ni.

Lalpan malsawm rawh se. Amen

Saturday, November 12, 2011

KTP Inkhawm Programme

November ni 14, Thawhtan Zan
A hmun   :  Biak In
Hruaitu  :  Nl. Rebecca Lalrotluangi, Branch C/M
Tantu  :  Nl. R. Lalrinchhani, Luka Group
Mihlate puala tawngtai  :  Nl. Lalruatpuii, Marka Group
Thilpek hlantu  :  Nl. Melody Pachuau, Matthaia Gr.
Thusawitu  :  Pu Biakengmawia, Branch C/M

Tawngtai Rammut

4th & 5th October, 2011(Zirtawp leh Inrinni) khan kan Branch KTP chuan Synod Revival Camping Center, Sihphir-ah Tawngtai Rammut kan nei a. Member 50, (mipa  30, Hmeichhia 20) lai kan rammu a ni. Zirtawp tlaiah kan Biak In kawt atanga kal chhuakin, zan tir lamah a hmun hi kan thleng a. Zanriah te kan eikhamah hmun hrang hranga kal darhin kan tawngtai a. A tuk zingkarah Chapelah tawngtairual leh Bible chhiarna kan nei a, tukthuan ei zawhah hmun hrang hranga tawngtai lehin, chhunah Chapelah a kharna inkhawm kan nei. Tlai lamah kan haw a, kan hun hman chhung zawnga min hruaitu kan Pathian chungah lawmthu kan sawi a, tin ei leh in buaipui kan sawm Pu Lalhmingthanga (Upa bial 7) chungah kan lawm hle.

Br. aiawhin workshop ah tel

Ni 9-10.11.11 khan EFFICOR, Delhi leh Shalom, Mizoram te tangkawp chuan Kohhrana Thalai Hruaitute pualin Zarkawt Kohhran Hall-ah HIV/AIDS workshop a buatsaih a. He Workshop hi Central KTP Secretary Upa Lalrinmuana'n hawngin, Khawpui chhung Branch KTP atangin mi 45 vel an fuankhawm a. Kan Branch aiawhin Tv.C.Malsawmtluanga, Branch Commtt. Member a tel.
Tv. C. Sawma hi HIV/AIDS lamah kan Branch hminga hma latu tura Central KTP ruahmanna anga Branch Committee-in a ruat a ni.

PNI Music video thar

Ni 30.10.11 (Pathianni) Chawhnu khan Kohhran Hall a Pathianni Naupang Inkhawmah Upa C. Lalbiakchhunga, Superintendent, NPSS chuan PNI Republic Veng Kohhran Music Video, ‘Ka nu min hrilh rawh’ tih chu a tlangzarh.
He music video hi Local cable hrang hrangahte thlan theih tura pek a ni a. A rimawi hi Pu David Zothankhuma buaipui niin, video hi Zova, Kanan Veng buaipui a ni. Tin, hla sak kar lakah hian Upa K. Saibela(L) thu phuah chham tel a ni bawk. A entu zawng zawngte ten Pathian malsawmna an dawn theih nan he music video hi Lalpa'n malsawm rawh se.

Upa Zalawma kan then ta

Kan Kohhran upa min, Upa Zalawma chuan 28th October, 2011(Zirtawp) zan dar 10:10 khan chatuan ram min lo pan san ta. Upa Zalawma hi Pastor Hranga Hrahsel leh  Pi Chaldaivungi te inkarah April ni 2, 1923 khan, W. Kanghmun-ah a lo piang a. Kum 1946 ah Lalthiangi nen inneiin fa 10 an nei a.
    Upa Zalawma hi rilru leh ngaihtuahna hmang thiam tak a ni a. Middle school a zawh hnuah Burma sipaiah a tang a, surgeant in a pension a. Sipaia a chawlh hnu hian Synod Bookroom-ah Account Clerk hna a thawk leh a ni.
    Republic Veng Kohhran leh khawtlang tan kawng hrang hranga sulsutu pawimawh tak a ni a. Kum 1965 a Republic Veng Kohhranin a Upa tur a thlanna hmasa berah khan Upa T. Romana(L) nen thlan a ni.
    Hun rei tak atang tawh khan a taksa hi chak lo hret hretin tun hun hi kan lo thleng ta a ni. Upa Zalawma ruang hi tlaivarpui a niin, a tuk Ni 27.10.11 (Inrinni) khan vui a ni a, Bialtu Pastor Rev. R.C Lalnghakliana'n anmahni inlamah vuina hun hman zawhah Biak Ina a vuina neihah Branch Commtt member ten kawngpui atanga Biak In kawt thleng a kuang an zawn a, vuina inkhawmah Kohhran Zaipawl te zaiin, Biak Inah hian Rev. Lalneihvura, Aizawl East Presbytery Moderator chuan a vuina hun a hmang a, chumi hnuah Republic Veng thlanmual ui em em in kan thlah liam ta a ni.
   Upa Zalawma'n a kalsan tak a chhungkhat laina te zawng zawng chungah Pathian thlamuana awm rawh se.

Saturday, October 1, 2011

Sermon (Thalai Aw, 2nd Oct.2011 Issue)


Danglam lovin

"Isua Krista chu niminah nen, vawiinah nen, kumkhua pawhin
a pangngaiin a awm fo vang..” (Hebrai 13:8)
B. Lianthanga, Upa Bial-4-na

    Headquater i thleng nghal mai ang aw! Speaker thusawi thiam tak thusawi ngaithlain, hun hnuhnung a nihzia te, Pathian hmangaihna thukzia etc. te ngaithlain, Campingah te kalin, lam ngai lote an lam a. Sual nasa tak ti thin ten an sim thu te, an harh thu te an han sawi a. Kan lam mup mup mai a. Inkhawm kal tlai kan awm lo, a va nuam tak em! ‘KTP inkhawmah ka absent tawh ngai lovang,... Zaipawlah ka inpe nghal e, Faith promise pawh tam deuh ka pe tawh ang... Lehkha pawh ka’n zir tak tak tawh teh ang’ tiin mi tam takin thuthlung thar an siam a. A hunah kal a, a hunah banga leng muang lovin, inah hawng nghal zatin, thawh tur awm ang ang thawkin chhungte awl zel tum tawhin, thil tui deuh ‘Chhungte eiah,’ tiin, nun thara nungin, chhungte zilh ngai lovin an lo awm ta zel bawk nen, mi hlawhtling a lo ni ta. Kumkhuain Malsawmna pawh a dawng zel, nupui pasal tha tak neihna a lo ni bawk si!
    A chunga kan sawi tak ang mi hi ka hmu teuh tawh mai. Tunah tar ka lo ni ve dawn ta a, hringnun zinkawng inthleh ki kawi dan hi a en dan pawh ka thiam ve ta viau e! Amaherawhchu,  sual kalsan a nun tha a nun tum tam tak, thla li thla nga a pamtul leh ta mai te erawh chuan pasal chhe deuh, nupui chhe deuh neiin in luah tur an zawng kawi an zawng kawi nia!
    Aw le, Bangladesh tuikhuah vang nge, hun hnuhnung a nih tawh vang nge ni, September thla velah hian, ruah tam namenlo a sur ta fo mai a, a tam lutuk avangin chhiatna nasa tak a thleng ta fo mai. Thalah ruah sur tlem vangin a hrehawm leh ta em em si. 
    A ni tak e, tih laia tih vaka, tih loh leh daih mai hi hlawhchhamna, retheihna, hrehawmna a ni e. ‘Lal Isua hnung ka zui zel tawh ang’ ti tawh kan ni deuh vek in a rinawm. A nih a hnu Isua chu niminah, vawiinah kumkhua pawhin a pangngaiin a awm fo (Heb 13:8) tih a nih hi maw le. Unau duh tak ngun takin Bible hi han en teh.
    Keini ho chu, kan han lawm ve a, mi aia uar uarin tawngtairualah a tawp kan khar thin a.  A au ring ring, a lam nasa sa, naute pawh kai chunga lam velin, mi ngawih lai pawha ngawi hleithei lovin, a hla sawi ring ring, Biak In lama thlarau mi, In lama thlahrang ni leh si chutiang anga danglam leh zung zung thin kan nih si chuan engtin nge ni zel ang le.
    Bible kan en chuan, ‘reng / englai pawhin’ tih a ni deuh vek mai. Lal Isua ngeiin, ‘In ring rengin awm rawh u’ a ti a. Petera pawhin, ‘Pathian thunung reng...chatuanin a awm reng (I Pet. 1:23ff),’ a ti a. Johana pawhin a thupek te zawm chu, ‘Amaha awm reng’ a ti bawk (I Johana 2:27,3:24). Lal Isua hunah pawh khan mi zawng zawng, Pathian biakinah a hnenah an lo kal thin (Luka 21:38) a ti bawk. Biak Ina kal thin, kal reng, englai pawha thunung reng chu keimahni ah pawh a nun reng theihna turin mahni lam i insiam tha ang u.
    Lal Isua chu kumkhua in a pangngai reng, a duh zawng leh duh loh zawng a inthlak ve mai mai ngai lo. Keini erawh chu kan hun tawng a zirin leh a hmun a zirin kan danglam fo thin. Kohhran tana rinawm kha, sawrkar leh midang tan kan rinawm hlei thei thin lo bawk.
    Isua lo kal lehna a hnai ta, nauvei tantirh angin lirnghing pawh a tam ta.  Kum 1980-2009 chhung hian India hmarchhakah ringawt pawh vawi 618 a nghing a ni. Ruang chhar, pawngsual leh inrawkte chu nitin deuh thaw hriat tur a awm a. Khawvel tawp hnaih chhinchhiahna hrang hrangte chu a lo thleng zut zut a. Heti chung pawh hian kan harh thei lovem ni?
    Chu khawpui mawi lam chu chawl lovin i pan zel ang u, Ralmuanna hmun reng a awm lo ve, khawvelah hi zawng. Thil an lo awm a, an ral leh thin. A hmangaih erawh a ngai fo, danglam ve lovin, hmalam panin. Lal Isua en tlat/reng-in, Zion tlang thlen hma loh chuan i kal zel ang u. Kan zalenna ram ropui a hnai tawh e.
          Lalpa’n a thu malsawm rawh se!  Amen.

KTP Hunruat


2nd October, 2011 (Pathianni) Fellowship Programme
A hmun         : Kohhran Hall
Hruaitu         : Pu Johny Lalawmpuia, Matthaia  Group.
Tantu         : Nl. R. Lalremruati, Luka Group.
Tawngtai rual : Missionary & Refreshment Sub-Commtt. member te tan
Hun hmangtu : Pu Peter Lalnunhlima, Secy. SML Sub-Commtt.
Sport inbuatsaih nan hun hman a ni ang.

3rd October, 2011 (Thawhtan) Zan Inkhawm
A hmun         : Kohhran Hall
Hruaitu         : Tv. Ramnuntluanga, Asst. Secretary
Tantu         : Nl. Lalrinchhani Ralte, Marka Group
Tawngtairual : Mihla, Missionary leh October thla a chanvo neitute tan.
Thilpek hlantu : Tv. Ramdinliana Renthlei, Johana Group
Thupui  sawitu : Pu Ramthansanga Khiangte, Br. Commtt. Member
Thupui         : Presbyterian Kalphung

Kohhran Hunruat


October ni 2, Pathianni
Chawhma (Sunday School)
Tantu    : Pi  Lalrochhingi (2)
Zirlai 37-na : Chhandamte chan tur

Chawhnu Inkhawm
Baptisma Sakrament

Zan Inkhawm 
Thuhriltu : Upa Lalzuithanga

October ni 5, Nilai Zan Inkhawm
Tantu          : Pi Lalhmangaihi (4)
Thupui hawngtu  : Pu Medalliana Sailo (10)
Thupui          : Ringtute Chanvo

October ni 8, Inrinni Zan
(Thuhril Inkhawm)
Tantu : Pi Vanlalfaki (2)
Thu hriltu : Pu R.C Thuama

Branch Commtt. Thurel

26th September, 2011 (Thawhtan) Zan Inkhawm ban khan Branch Committee neih a ni a, thurel tlangpui te chu hengte hi a ni


1.  Kan member Lalhruaitluanga s/o Dr. Lalhnuna, Johana Group chuan Ni 05.10.11, chawhnu dar 1:00-a kan Kohhran Biak Ina nupui a neihna turah Inneih Inkhawma telpui tur leh a lawmna chawhlui kilpui tura KTP member te min sawmna chu a remchan anga puanzar nise kan ti.

2.  Central KTP Blood Donation Calendar : Central KTP-in Blood Donation Calendar a siamah kan Bial thisen pek hun atan January, 2012 min rawn ruat sak a. Amaherawhchu, ruahmanna kan lo siam tawhah kumin 3rd Dec.2011 a thisen pek kan lo tum tawh avangin CKTP hun ruatah hian kan pek theih loh tur thu hi Bial KTP Committee-ah hriattir nise kan ti.

3.  Branch KTP Sport kan neih turah CYS te tel ve dilna CYS Sub-Commtt. atanga rawn lut chu Br. Commtt. hmasa lama telh loh tura kan rel tawh angin Br.Commtt. thu tih tluk tawhna anga kal nise kan ti.

4.  Branch Sport kan neih turah SML Sub-Commtt. atanga rawtna an rawn thlen te kan sawiho a, siamthat ngaite kan siamthat hnuah pawm a ni.

5.  Evagelical Cell Sub-Commtt. atanga Street Preaching neih an rawtna chu kan sawiho a. A hun atan 4th Dec. 2011 (Pathianni) zan Inkhawm ban nise, programme kimchang chu Evagelical Cell Sub-Commtt. ten lo ruahman se kan ti.

6.  Ni 3 & 4 November, 2011 chhunga Synod Revival Camping Centre, Sihphir-a Tawngtai Rammut kan neih turah programme leh tuldangah te Br. O.B ten ruahmanna lo siam se kan ti.

7.  Amosa bu atanga Bible Exam kan neih chu lo endik tur leh a kaihhnawih thildangte lo ngaihtuah turin Evangelical Cell Sub-Commtt. kan ruat.

8.  13th - 16th October, 2011 chhunga kan Kohhran Biak Ina Missionary Retreat for Home Mission Region kan thlen turah Reception Department atanga min ngen angin, kan Kohhran huam chhunga mikhual thleng thei tur inzawh chhuah chu Group tin O.B ten hma lo la se, Branch Secy. / Treasurer hnenah ni 02.10.11 hmain hriattir nise kan ti.

9.  Kohhran Zaipawl almirah hman lai chu a that tawk loh avangin, Kohhran Committee-ah almirah thar pakhat dilna thlen nise kan ti.

10.  Silpouline thar pahnih lei nise, Treasurer & Fin. Secy. ten hma lo la se kan ti.

Sunday, July 24, 2011

Inkhawm Prog


25th July, 2011 (Thawhtan) Zan KTP Inkhawm

A hmun                          :  Biak In
Hruaitu                           :  Pu R. Lalhmangaihsanga, Br. Comtt. Member
Tantu                             :  Tv. Lalawmpuia, Johana Group
Mihlate puala yawngtai   :  Nl. Lalbiakremi, Matthaia Group
Thilpek hlantu                :  Tv. F. Malsawmtluanga, Luka Group
Thu sawitu                     :  Tv. Ramnuntluanga, Asst. Secretary
Solo                              :  Nl. K.Lalremruati, Johana Group

Tawngtai Crusade


Kan Kohhran chuan 17th July, 2011 (Pathianni) zan khan thlakhat chhung awh tur Tawngtai Crusade kan hmang tan a. Crusade hawnna hi Pathianni zan inkhawm banah neih a ni. Biak Ina hun ruatsa (inkhawm) awm loh lai engtik hunah pawh tawngtai theih a ni a. He Crusade-ah hian Kohhran mipuite kan tel thain, chhun leh zanah te tawngtaina neih mek a ni a. Kohhran mipui tam thei ang ber tawngtai tura beisei kan ni a. Tawngtai thupui chu Biak In chhungah chhawp a ni.

Sermon

Thalai Aw : 24th July, 2011


Khawi kawng nge i zawh thin le!
        I kawng zawng zawngah amah hre reng la, i kawng chu a kawhhmuh zel ang che. Thufingte 3:6
R. Lalremruata, Luka Group

Ringtu nun hi a chhuk chhovin, a nuam leh hlimawm ringawtah a tawp mai lova. Thlemna, harsatna leh tawrhna tam tak paltlang tur a awm thin. Engkim hi kan ta a nih tlat avangin hlim lai leh lungngaih laite, nawmsak lai leh hrehawm tam tak tawrh a tul hun pawh a awm thin. Heng harsatna hrang hrang hi mihring chakna leh theihna hmanga do let chi a ni lova, tam tak phei chu chunglam fiahna hmanrua pawh a ni thei. Heng hun a lo thlen hian ringtu tam tak chu kal ngaihna hre lovin vanduai leh tuar bik riau a inhriain Pathian lakahte an vuivai a, piangthar tha, lamtual thleng thlenga amah faka ban phar tawh te leh rawngbawltu tha ni a ngaih tawhte pawh beidawnna ruamah an tlu lutin sual lamah bawk an hawi kir leh thin.

Kristian piangthar tha tak chu heng hunah hian fimkhur taka kalin, Tirhkoh Paula’n, “Ka chak loh a piangin a ni ka chak thin ni” (II Kor 12:10) a lo tih angin chung harsatna leh kawng bumboh chu anmahni intih chakna hmanruaah hmangin Pathian rawn chungin tawngtaina nen an hmachhawn a. An  tawrh chhuah meuh chuan chung an harsatna chuan a tilawm a, anmahni a tichak tharin kal zel dan an thiam phah zawk thin.

Kristian piangthar tha dik tak chuan khawi kawng pawh zawh se, a nunah Pathian hmel a lang tur a ni. Ni tin hnathawhna te, intihhlimna hmun leh mahni pindan chhungrila an awm laite, khawtlang  thil tihnaa an tel vena hmun leh zin veivahna thlengin ringtu piangthar a nihna a lang tur a ni. Malsawmna petu Pathian dah chungnungin hmahruaitu leh hnungdawltuah a hmang tur a ni. Tichuan, rinna kawngah thangduang zelin miten amahah rah tha eitur an hmu dawn bawk a ni. Chutiang ni lova, a awmna hmun leh thil tawn a zira fimkhur lo taka a kal a, a duhzawng, ngainat zawng, chak zawng leh nuam tih zawng ang anga a kal mai mai chuan a ngaih a sam tial tial ang a, dik inti si lo, inthiam chawp siin a awm tual tual ang a, dinchhuah leh harsa khawpin kal ngaihna hre tawh si lovin a lo tlu sawp leh mai dawn a ni. “Kristian kal fimkhur rawh, hlauhawm a hnai..”(KHB: 405)

Thlemna leh harsatna hrang hrangte hi ringtu nun kawnga kan paltlang tur a nih rualin, heng harsatna kan tawh tam tak hi chu kan zawh loh tur kawng kan zawh a, kan dai loh tur ram kan dai thin vang leh keimahni duhzawng thlahlel a chawtak awmna, chunglam hruaina kawng lam zawh lova kan tih loh tur kan tih tam lutuk vang pawh a ni thei.

Beram chu a neitu (a pu) hmuh phak lova a tlat fal chuan khamah te tlain, sa ten a seh phah thin. Chutiang chuan piangthar tawh pawh a awm lohna tur hmun - zu leh sa hmun, nulat tlangval nawmchen na hmunah te, thianghlim lo taka sum leh pai hai luhna leh thil tha lo hrang  hrang lam kawng zawh a, amah neitu Pathian hawisana a tlat fal fo chuan, a tum lawk leh duh reng vang  ni lovin, a awmna hmunin a zir miau loh avangin, setana’n thlemna hrang hrang hmanga ei ralin, a duh aia thuk khuarkhurumah a tla let leh vawn vawn a, talchhuah a harsa leh hle tawh hin.

Chuvangin, piangthar tawh chu khawi hmunah pawh kal se, Pathian biak inkhawm a thlahthlam tur a ni lova, Kohhran Biak In awm mumal lohna pawh ni se, Bible chhiar leh tawngtaiin tan a la tur a ni. Tualchhung Kohhrana a biak Pathian tho kha hmundangah pawh a Pathian a ni tho si a. “Lalpa mit chu hmun tinah a awm a, thil tha lo leh tha a enthla reng thin” (Thuf. 15:3). Chuvangin piangthar, chhandamna chang tawh kan nih chuan chaw tak awmna leh kawngzawh tur dik Kohhran mite inpawl khawmna Biak In lamah kan awm tam tur a ni. ‘Thenkhat tih dan anga kan inkhawmte bansan lovin, infuih tawh zawk ang u’ (Heb. 10:25).

Chutichuan, khawi hmunah pawh fimkhur taka kalin, kan zawh tur kawng dik tak kan zawh theih nan LALPA’N malsawm rawh se.

July Faith Promise


Sunday, July 17, 2011

Bial KTP Silver Jubilee kan lawm

Ni 9 & 10 July, 2011 khan Republic Veng Pastor Bial Kristian Thalai Pawl chuan kan kum 25-na 'Silver Jubilee' kan lawm. Lawmna hun kan Kohhrana kan thlenah hian hun hlimawm tak hmangho thei tura min kaihruaitu Pathian hnenah lawmthu awm rawh se.

Ni 9.7.11 (Inrinni) khan zing dar 11:00 ah inkhawm neiin, he hunah hian Bial KTP Secy. hnen atanagin report ngaihthlak a ni a, kan Bial KTP Leader Pu Lalhmunsanga chuan Silver Jubilee Souvenir a tlangzarh bawk a, Kohhrana pathuma zaipawl tean zai theuh bawk a ni. Inkhawm banah hian Biak In kawtah Jubilee dar vuak a ni a, Bial KTP Leader lo ni tawh zawng zawng te bakah tuna Bial O.B tanglai te bakah Pu Lalhmingthanga, CKTP C/M ten Jubilee dar hi an vua a ni. Silver Jubilee Monument hawnna neih zui nghal a ni a, Upa Lalthanghluana, Bial Chairman chuan monument hi a hawng.

Inrinni chawhnu hian Kohhran Hall-ah Variety Programme hlimawm tak hman a ni a, he hunah hian hruaitu hlui (Bial O.B lo ni tawh zawng zawng te) hnenah chawimawina thuziak hlan a ni. Tlaiah Jubilee Ruai thehin zanriah kan kilho a ni. Inrinni zanah Pathian biak Inkhawm neiin, kan Bial KTP Leader hmasa ber Upa R. Kapliana'n thu a sawi.

Ni 10.7.11, Pathianni chawhnu inkhawm atangin Jubilee lawmna hman chhunzawm a ni a, Upa Lalrinmuana, Gen. Secy. Central KTP chuan thu a sawi. Inkhawm banah Fellowship hun hman a niin, hun hlimawm tak hman a nih bakah Bial KTP Sport neiha lawmman te sem a ni bawk. Zan Inkhawmah Bialtu Pastor Rev. R.C Lalnghaliana'n thu a sawi a, Inkhawm banah Fellowship hun hlimawm tak hmangin, kham lo tak chungin Bial KTP Silver Jubilee lawmna hun chu kan khar ta a ni.