Saturday, February 26, 2011

Member Sunna

Kan member Nl. Lalhmunmawii Fanai, Marka Group (c/o R. Thangdingpuia) chu Ni 19.02.2011 (Inrinni) zing dar 7:16 khan pumna vangin a boral a. A ruang hi anmahni chenna khua Khawbung vuiliam a. A thlahna hun Pu R. Thangdingpuia te Ina buatsaihah Branch KTP hminga ralna Rs. 500/- a chhungte hnenah hlan a ni. Amah hi Aizawl Theological College-a 1st Yr. B.D zirlai a ni. Hun lo taka kan rawngbawlpui duhawm takin min boralsan hi kan ui tak meuh a, a kalsan tak a chhungkat laina zawng zawngte Pathianin thamuanin awmpui rawh se.

Wednesday, February 16, 2011

Retreat neih a ni

Dt. 15.02.2011 (Thawhleh) zan khan Kohhran Hall-ah Branch Committee member te leh Group Committee member ten Retreat an nei. He hunah hian Speaker Upa R. Vanlalruata, Br.KTP Ex-Officio member chuan rawngbawlna kawnga hruaitute mawhphurhna hrang hrang te sawiin, he retreat hi hlawkthlak taka hman a ni a, member 98 an tel a ni.

Sunday, February 13, 2011

KTP Thawhtan Zan Inkhawm Prog. 14th Feb. 2011

A hmun                          :  Biak In
Hruaitu                           :  Pu Peter Lalnunhlima, Br. Comt.
Tantu                             :  Nl. Nancy Lalawmawii, Marka Gr.
Mihlate puala tawngtai    :  Nl. K.C. Zosangpuii, Johana Gr.
Thilpek hlantu                :  Tv. Lalsangliana, Luka Gr.
Thusawitu                      :  Tv. Ramnuntluanga, Asst. Secy

Article (Thalai Aw, 13th Feb. 2011)

Mi ang lo  -  Jt. Editor, Thalai Aw
    Zan khat chu kan thiannu pakhat hian tawngtai dam thei pakhat Pathian aw hriaa a kawrlum mi hnena pe, chumi hnua engtik lai maha khaw vawt hre ta ngai lo chanchin a sawi a. Kei ta pek chuan “Chu, mi a ang ta lo a ni maw?” ka lo ti vat a. Ani chuan, “Mi an lohna a nih loh chu, Pathian malsawmna a dawng let a nih chu” tiin min chhang a. “Pathian malsawmna dawngin mi a ang ta lo a nih chu!” ka la ti hram a. Ka chhan zui lehna chuan a rilru a hmin chuang lovin ka hria! 
    Ka haw hnu chuan ka mut hmunah ka ngaihtuah zui nasa ta mai a, Bible-a Pathian mi hman hote ka ngaihtuah a, an rinna âtthlakzia te ka ngaihtuah zui bawk a. ‘Pathianin a hman theiha awm tur chuan mi an lohte pawh hi a lo ngai a nih hi’ ka ti ta hial a. Tin, Pathian malsawmna dawng tur pawhin mi aia ‘ât’ fal a ngai bawkin ka hria. Pathian rin tak takna hi chu âtna a lo nih hi! Ezekiela pawh khan Pathianin ti tura a tih kha i-he lovin a ti zel mai si a, a hunlaia mite tih loh dan anga tih ngai a tam si. A â tak meuh a nih kha. Nupuite thi pawh sun hman lek lovin Pathian thu a awih a; tlawm leh zah pawh dawn lovin saruakin a awm thul. A chang leh mite ten em em chiin a chaw siam a ngai a; engnge a tih dawn hriatpui si lohvin a inpu bawr leh luai thul. Tak tak a ni nge ni lo fiah theih si loh thute a sawi vak vak a. A chhungte tan chuan a manganthlak ngawt ang le.
    Abrahama, ‘Rinna Pa’ tia vuah hial khawpa a awm chhante kha mite ngaih chuan a ât vang mai mai a ni asin. Pathian aw a hria a, a ring tawp mai. Pathian chuan a be zui zen zen chuang si lo. Mahni khua leh pianna pate kalsan khawpa hmuh theih hleih loh thute han awih tak mai chu leh; a âtthlak a ni! Mahni chauh pawh ni lovin a nupui leh a neih zawng zawngte nen a chhuak ta vek mai si a. Chuta chhapah a kalna lam tur tak ngial pawh a hre si lo. A kal tur kha hmu ta ni ila â ka ti awm mang e ka ti! Pathian khan chi tam tak thlaha lo pung turin mal a sawm a. Chu pawh chu a chak laiin a hmu lova, beisei tur awm ang pawhin a lang hek lo. Mahse a vui lova, a phunnawi hek lo. Pathianin a tiam tawh a, a nghak mai a ni. A tar tawh hnua Pathianin fa pek tur thu a hrilh pawh khan awih tawh awm loh tak; mahse, Pathian thu chu a ring mai a ni. Abrahama nun kha en chhuak vek ta ila Pathian thu a awihna lamah khan a âtzia chu chiang takin a lang vek a ni.
    Thuthlung thar lamah te leh tunlai hun thleng pawhin, Pathian mi te hi chu an va â thin em! Khawvela nuam taka khawsa thei tur hian Pathian avangin an chan a, nun nuam an kalsan mai mai a. Mite’n neih tuma an ban tâwk tâwk te leh nih phak tuma an beih tâwk tâwk dinhmun tha te pawh chang thin mah se, an vanneihzia an hre lo emaw tih mai turin an kalsan daih mai zel a. ‘Pathianin malsawmnain min vur a, ka lawm tak tak a ni’ tia chên ta mai lovin, Pathian tana thawh zel chakin an chhuahsan nawlh fo mai. Pathian ringa a thuawih zel mai te hi chu khawvel chuan ‘mi ang lo’ hmuhin a hmu zel mai si a, khawvelin fing a tihte hi kan Pathian hian ‘mi ang’ hmuhin a hmu bik ang em le?... tih te ka ngaihtuah zui mai mai a.

Saturday, February 12, 2011

Sermon (Thalai Aw, 13th Feb. 2011)

Isua hi Pa hnen thlenna kawng a ni
“Isuan keimah hi kawng leh thutak leh nunna ka ni; keimah a kallo chu tumah Pa hnen an thleng ngai lo” (Johana 14 : 6)
Vanlalngaia Ralte
Republic Vengthlang

  Lal Isua’n, “Ka kalna tur a kawng chin in hria e” (Johana 14:1-5) a tih a, Thoma’n “A kawng chin engtinge kan hriat ang” ti a a lo zawt hlauh hi keini tan Isua chu, Pa hnen thlenna kawng a nih kan hriat theih phah a, Lal Isua pawimawh zia a tichiang hle. Aizawl East Presbytery Khawmpuiah khan, Isua chu ‘kawng leh thutak leh nunna’ a ni tih thupuiah neih a ni a. Kha thu kha kan ngaihthlak chuan ngaihtuahna thar min siam thei awm e. Ringtu inti si hian Isua thutak nunnaah kan kal meuh em? tia inenfiah chungin Isua nihnain a ken pawimawh thiau si te hi hetiang hian lo thlirin i lo ngaihtuah tlang teh ang u.
    Lal Isua vanram luhna kawng a nihna :  Ka vanram innuam tak kawng chu kross a ni, chu lo chu kawng a awm lo” Kristian Hlabu No. 205-ah a ti a. He hla hian Isua kawng kross chu pumpelh a, Pa hnen thlen theih a nih lohzia a tichiang hle. Pa kiangah kan tan hmun a han siam a, A hnena min lakna tur a lang lo tur kan mihring hlui hi Amah Kristaah, kraws-ah tihborala a awm nan kan sualna, natna leh lungngaihnate a phurh thu a sawi  (Isaia 53:4-5) leh Rom 6:3-6-a a sawi, kan mihring hlui chu Krista hnenah khenbeha a awm a, Amaha kan thih a, baptistma-a phum bova kan awm a, a thawhlehna a nunna thar neia kan awm nan, sualna nei lovin kan aiawhin kan sual pu taksa chu hmangaihnain min tihboral sak hial thu min hrilh bawk a. Chu chu a lawm, sualna avanga kan tuar ve ngai lova, kan Lalpa in kan kawng kraws a lo zawh hmasak a; kan tan kawng a lo siam hi a ni fakna hla phuahtuin tha ti taka a phuah a, hlim taka kan lo sak tak chu. Krista Isua thihna leh thawhlehna nun tawmpuitu kan nihna hi Pa hnen kan thlenna tur kawng chu a ni phawt a.
    Isua thutaka kalna kawng a nihna :  Kristian Hlabu no. 300-ah “Lal Isua chu kawng leh thutak, Chawlhna ram panna kawng”  tih a lo ni leh a, hei hi kawnga kan kal dan tur chu a ni. Matthaia 11:28,29-a Isuan min kawhhmuh chu a nghawngkawl bahpui a ni. Tuna kan thlarau tan chawlhna leh chatuana kan chawlh hlenna tur chu thutak Isua hi a ni chiang hle a ni. Tin, Johana 8:30,31-ah a sawi leh angin, Thutak chuan sual bawih ata min bantir a, a thua kan awm chuan a zirtirte kan ni ang a, thutak keimahnia a awm reng bawk chuan Isua thutaka kal kan ni tihna a ni ang a. Johana 16:13-a zirtirte hnena sawi angin, Thlarau dik tak chuan thutak kawnga min hruai luh chuan, Pa hnen kan thlenna thutaka kalna kawnga kal kan ni tihna a ni dawn a ni. A va pawimawh leh em!
    Isua nunna kawng a nihna :  He thu hmanga hla an lo phuah chu “Kawngzim tak zau taka hawn chu, mi tinreng tan buatsaih a ni; suala khat liam thinlung hi Amah pe ila, nunna ramah lo lut rawh, tiin a ko mek che a ni,” a lo ti ve leh a. Heta kawng zim a tihah hi chuan kan duhzawng thil a leng lova, Lalpa duhzawng chauh leng, Krista nunna nei te chauh leng a ni. Chuvangin chatuana nunna Krista neitu ni tur chuan mahni duhdan a kal ngawt lovin, kan Lalpa duhdan a kan kal a ngai a ni. Ringtu tan he kawngzim hi a pawimawh hle mai.
    Tin, Isua nunna rama kan luh theih dan tur chu Krista nunna leh thawhlehna nun tawmpuitu nihna thlarau kan neih hian a ni. Johana 6:54-57-ah Isuan, ‘Pa nung chuan min tir a, Pa zara nung kan ni ang bawkin tupawh mi ei chu keima zarah ani pawh a nung ang’ a ti a. Tunah pawh Isua nunna thu hi thlarau nun zelna atana kan mamawh a, kan eireng chuan Pa hnen thlenna tur kawngah kan  kal mek tihna a ni bawk ang. Tin, a chian leh zual nan motor chhunga kan chuan a, driver-in kan tumna hmun min thlen ang hian, Isua-a kan awm chuan, Amah Isua chuan Pa hnen min thlen mai dawn tihna a nih chu!
    A tawpna atan, kan thupuiah Isua hi Pa hnen thlenna kawng a ni tih kan tarlang tawh a. Isuan “Kei hi kawng leh thutak leh nunna ka ni, Keimaha kallo chu tumah pa hnen an thleng ngai lo” a ti a, Keini ho hi Pa hnen thleng tur niin kan inhria em? Isuaa awma, Amaha kal kan nih nan Lalpa’n a thu malsawm rawh se.

Branch News

Branch Retreat
Ni 15.02.2011 (Thawhleh) zan dar 6:30 hian Branch KTP Committee Members leh  Group Committee Member zawng zawng te Kohhran Hall-ah Retreat neih tur a ni a, Speaker atan Upa R. Vanlalruata a ni ang.

Jubilee T-Shirt
Bial Silver Jubilee T-Shirt peih a ni tawh a, hun remchang hmasa berah zawrh hnatlang neih tur a ni. T-Shirt hi Bial chhung Branch tin ten rawng hrang theuh hetiang hian kan in sem dawn : Republic Veng - A var (White), Republic Vengthlang - A pawl (Blue) Upper Republic - A hring (Green) te a ni a.

Thingpui lumKan Kohhran chuan Republic Veng Pastor Bial Kohhran Hmeichhe Inkhawmpui kan thleng mek a. Pathianni chawhma Inkhawm banah hian Thingpui ruai buatsaih tur a ni a, thingpui lum leh sem hna thawk turin Branch Committee leh Refreshment sub-committee member zawng zawngte beisei kan ni. Member ten i ngai pawimawh ang u.

Bial KTP Audio Album
Bial KTP Audio Album chu veng chhungah zawrh mek a ni a. Kan Album leiah, a ri leh engemaw tha lo lai a awm a nih chuan a rang lamin hruaitute hrilh ila, a thleng theih dawn a ni.

Feh chhuah
Barak Area Meitei Thalai Inkhawmpui vawi 3-na, 18 - 20 March, 2011 chhunga Lala, Assama neih turah a hmanpui tura Branch KTP min rawn sawm angin heta kal duh turte chu 23 Feb. thleng hming inziahluhtir hun hawn a ni

Saturday, February 5, 2011

Sermon (Dt. 06.02.2011 - Thalai Aw)

RILRU THARIN HMA I SAWN ZEL ANG U
Engpawh ni sela, kan thlen chin atang khan hma i sawn zel ang u.” (Phil 3:16)
Rev.S.Lalkhuma(Rtd.)
Field Director
Varanasi Mission

    Kristiante hi hmasawn zel tura kal mek leh Vanram thleng tura buatsaih vek kan ni. Hmasawn lo dinhmun hi chu hnungtawlh anih loh pawhin thanglo nun a ni. Khawvel sorkarah America a hausa lawt lak a, tunlaiah hian China a thang sawt ber a, India in a dawt thung. Chuvangin, kan ram ngei pawh economics-a a thanna hi lawmthu sawi a tul. Ram hrang hrang han tlawh kual hian a tlawhtute titi berah chuan khawthlang lam emaw khawchhak lam pawh nise, a ram mite an changkan zia an sawi uar hle a.
    Chutianga changkang tur chuan an phu reng nachhan an sawite chu an taihmakna lai hi a ni. Singapore-ah chuan zing dar 7:30-ah ni a chhuah laiin, a hma zing dar 6:30 velah motor a jam mup mup tawh a ni. Tin, dawrkai reng reng hian thu chungin dawr an nghak lova, ding chungin thil lei duh lokalte kha an lo dawr thin. Hausa hlawm hle mah se, sum an hmang thiam em em a, an it zawng nazawng an lei ngai lova, a tangkai dan tur leh a hmanna tur an chhut lawk thin. Hnathawk lova awm mai mai nula tlangval hmuh tur an awm lo. Nikhatah darkar engemaw zah tal chu an hna hmuh dan azirin an thawk vek a ni.
    Tichuan, kan Zoram nunte hi thlir ngun a tul khawp mai. Kum thar kan chuankainaah hian nikum aia hma kan sawnna tur kawng engemaw tal dap chhuak thiam ila, sikul naupangte chuan a aia sang zawkah insawn a, an zir zel ang hian kan hnathawh lai theuhah hma kan sawn dan tur ngaihtuah ila, chu chuan min ti thang ngei ang. Mihring nunah hian a tha lam ngaihtuah mi (Optimist) nih hi a lo tul khawp mai. Mi rilru te leh tawi takte hi mi ropui tak an ni ngai lova, rilru zau leh thil thui tak ngaihtuah mite hian hma an sawn thin. Thinrimna pai rengtu aiin ngaidama theihnghilhtute nunin hma a sawn a, mi uikawmte aiin mi thilphalten malsawmna an dawng tam thin. Mahni chauh inngaihtuah ching mi aiin mi dangte rawngbawlsak tamtu apiang an hlim thin.
    Tichuan, rinna nun kawngah pawh kan rin tawh dan duhtawk mai lova, rin zelna nuna kalten an thleng thui thin. Thlarau lam malsawmna dawn tawh chapopuia sawi sawi aiin a thar zel dawng tura Pathian be pawptuten hma an sawn thin. Mizoram Kristianna chanchin kan sawi hian lawmawm leh ropui kan tih laiin inchhuanna leh chapona a awm awl em em a, chu chuan midangte va hmusitna a thlen thei bawk. Kan Pathian nung rin lai hi Mizote Pathian chauh a ni lo tihah hian chian viau a tul a ni.
    Mahni mimal nunah te, midang nen kan thawhhona nunah te, Pathian hnena kan thil pekah te hian hmasawnna tur nei lo tumah kan awm lova, chuvangin kan thlen chinah khan duhtawk mai lovin hmasawnna tur ngaihtuah chhuak thar zel ila, chu chuan kan khawvel nun tawite hi a tihlimin a ti thlamuang zel dawn a ni. Kan rawngbawl hna theuhah hian rual kan pawlna-ah te, kan thusawi danah te, mite kan hmangaih danah te, midang tana kan inphalna leh inpek danah hian hma i sawn zel ang u. Keimahnia setana hmanrua thil tha lo lo thleng thinte pawh thil thaa hneh zel turin tan lak reng a tul a, kan duh phawt chuan hmasawnna tur kawng hi a inhawmng reng a ni.
    Kan rawngbawl hna-ah hian tan la zel ila, Pathian thu tulpui tel lova kan buai viau chuan Thlarau Thianghlim pawlna kan hlat tawlh tawlh ang a, Pathian duhzawng en reng chunga eng hna pawh kan thawh chuan hma kan sawn zel ang. A chhe lam sawi tur hi tam tak awm mah se, a tha lam thil hi sawi tam zawk ila, khawkhatah hian mi tha vak lo kan sawi lar hle laiin a let engemawzahin mi tha an tam zawk daih a ni ti zawngte hian chhut tur a ni. Mahni thlen chin atang theuh hian hma i sawn zel ang u.
Lalpa’n malsawm rawh se, Amen.