Monday, March 7, 2011

Faith Promise - February, 2011 thawh zat

KTP Inkhawm Prog

7th March '11 Thawhtan Zan Inkhawm

A hmun : Biak In
Hruaitu : Nl. H. Lalchangliani, Br. Comtt. Mem.
Tantu : Pu C. Vanlalrema, Luka Group
Tawngtairual : Mi hlate, Missionary te leh March thla chhunga chanvo neitu te tan.
Thilpek (Project pual) Hlantu : Nl. Lalrinchhani Ralte, Marka Group
Thusawitu : Pu Ramthansanga Khiangte, Br.Comtt. Mem.

Sermon (Thalai Aw, 6th March, 2011)

Rinna
Tin, rinna hi thil beisei te awm ngeia hriatna, thil hmuh lohte hriatfiahna a ni
(Hebrai 11:1)
Peter Lalnunhlima
Br. Commtt. Member

Tirhkoh Paula te Phillippi khuaa lung Ina an tum khan Pathian hnathawh nasa takin a lo lang a, tan In kawngkharte Pathianin a tihchhiat sak a, an kawl bunte pawh a tlak tir vek tih kan hria. Kha tan In vengtu khan Pathian hnathawh mak tak mai a hmuh khan Chhandam nih ve a duh ta hial a nih kha! Tirhkoh Paula chuan, “ Lalpa Isua ring la tichuan chhandamin i awm ang, nang leh I chhungte nen,” a ti a ni. Keini pawh chhandam kan nihna chhan chu Lal Isua Krista kan rinna hi a ni.
Amaherawhchu, keini rinna avanga khawngaihna a chhandamte hian, Lal Isua ringtu kan nihna hi he khawvela kan thil tawn hrang hrangah leh kan khawsak phung hrim hrimah te, harsatna leh manganna chi hrang hrang lo thlen hunah te hian Pathian kan rinna hi a lang chhuak lo fo thin. Kan harsatna tawhah te, thlemna leh manganna kan tawhah te, kan nitin nun hrim hrimah hian Lal Isuaa rinna nghah a, a hnathawh lo lang tur nghak veng veng mai tur kan nih lai hian, kan rilru a hah a, buai phili a kan lo mangang viau zel hi kan inenfiah a tul hle awm e. Kan Lal Isua hi kan ringhlel nge, kan ringlo hrim hrim, i inngaihtuah chiang teh ang u.
Kan hmalam hun leh kan thil tawna kan buainaah te pawh Pathian kuta innghat chunga kal ai chuan keimahni kan inringtawk hmasa a. Pathian aw ngaithla hauh lovin kan thiam ang tawkin kawng kan in zawn chiam mai thin a, a tawpah buaina ata buai leh zualnaah kan tlu lut fo thin. Engkima kan engkimah hian Pathianah rinna i nghat ngam phawt ang u, tah chuan inchhirna tur a awm ve lo. A tirah bumbohin rualrem lo angin lang mah se, a tawpah chuan fel fai taka hlen chhuahin a awm thin. Tlai leh muang angin lang thin mah se, a hun takah a lo thleng thin.
Thenkhat chuan Pathian hnenah chuan rinna kan han nghat chhin thin tak na a, mahse kan rin angin Pathian chu alo che leh si lova, kan vui a Pathian hi kan thiam lo zawk lek lek thin. Pathiana rinna nghat tak tak chuan an chungah an duh loh zawng tak pawh thleng se Pathianin an thatna tura a remruat a ni ang tih an ring nghet tlat a, nun hahdam takin thil tha lo ni a kan ngaih pawh an tuar thin.
“Rinna chu thiltih nei lovin amah chauhin a awm chuan thi a ni” tih Jakoba lehkhathawn bung 2:17-ah kan hmu. Pathian ringtute hian kan rinna hi a thih loh nan, thiltih leh tihtak zeta lanchhuah tir i tum ang u. Sam 37-ah khan engtin nge a inziah, “I awmdan tur chu Lalpa chungah nghat la, amah chu ring la aman a then then a ti ang” a ti lo, “I awmdan tur chu Lalpa chungah nghat la amah chu ring la aman a ti vek ang” a ti zawk. Pathian chuan a then then emaw a zatve lekin emaw hlen chhuak lovin emaw min thawh sak dawn lo, kim tak leh zo fel fai takin a hlen chhuak dawn. Chuvang chuan Pathian hi ring mai tur kan ni.
Tin, Pathiana rinna nei tak tak mite chuan engkim chan huam leh thih huamin Pathianah rinna an nghat. He khawvela an thil neih hlu ber chan mah sela a let tam tak aia ropui zawk an hmu let dawn tih rinna nghet tak an neih avangin he khawvel ropuina leh nawmna ngainepin hrehawm tuar an hlau lo. Mosia khan Pathian hre loa reilote atana ropuina leh nawmsakna chen ai chuan Pathian mite nen tihduhdah tuar a thlang zawk a, chu tawrhna chu rosum tam takah a chhiar zawk a ni. Nakina chatuan atan a ropuina leh a lawmman tur a awm a ni tih rinna lian tak a neih vang a ni.
Keini ringtute hian thil kan hmuh theih lohte hi a awm ngei a ni tih rin a, kan beisei tlat chuan kan ring thlawn dawn lova, engtik niah emaw chuan kan rinna hi tihfamkimin a la awm dawn a ni.
Lalpan a thu malsawm rawh se.

Kan member boral

Kan member, Lalruatfela, Luka Group s/o Pu K. Lalbiakliana chu ni 4.3.2011 (Zirtawpni) zing dar 8:00 khan Aizawl Hospital & Research Centre, Mission Veng-ah luna avangin a boral a. Hemi ni vek, chawhnu dar 1:00 khan bialtu Pastor-in a vuiliam a ni a. Lalruatfela kalsan tak, a chhungkhat laina te kan tuarpuiin, Pathian awmpuina chang zel turin duhsakna kan hlan e.

Rev. S. Lalhluma kan chan ta

Kan Kohhran Committee Member, Rev. S. Lalhluma chuan 1st March, 2011 (Thawhlehni) zing dar 4:15 vel khan Parkinson’s Diseases avangin chatuan ram min pansan ta a. Hemi ni vek hian In lamah vuina hun hman a nih hnuin kan Kohhran Biak Inah, chawhnu dar 1:30 khan a vuina hun hman a ni a, chumi hnuah Thlanmual lamah ui tak chungin Kohhran mipui ten kan thlah liam ta a ni. A kalsan tak a chhungkhat laina te kan tuarpui takzet a ni.
Rev. S. Lalhluma hi ni 23.5.1931-ah Pu Thanchhuma Sailo, Farkawn leh Pi Thankimi Chhakchhuak te inkarah a lo piang a, an unau hi 12 an ni. An unau zingah hian Pastor 2 leh Kohhran Upa 1 an awm. Ni 23.5.1962-ah Lalthanmawii nen inneiin fapa 2 leh fanu 3 an nei.
Kum 1946-ah Lower Primary zovin, kum 1950-ah M.A.V. School, Sialhawk atangin pawl 6 a zo leh a, kum 1951-ah G.M. High School, Champhai-ah pawl 7 a zir laiin in lam harsatna avangin zirna a chawlhsan rih a. Kum1954-ah Farkawn Kohhran-a Pu Chhawnluaia rawngbawlnaah Piantharna a chang ve ta a. Tichuan, kum 1957-’59 chhung khan Aizawl Theological School-ah a lut ve leh ta a ni.
Kum 1960-ah Pro.Pastor hna thawk turin Synod in a la a, kum 1961-ah Pastor atan nemngheh a ni. Pastor hna a thawh chhung hian heng bial te hi a vawng a - W. Phaileng (1960-’65), Sateek (1964-’66), Khawbung ‘S’ (1967-’79), Kawlkulh (1980-’89), Zemabawk (1990-’93). January, 1994 khan Pension-in a chhuak ta a ni.
A nu leh pa chu ringtua siam turin tan a la a. Ni 10.6.1967 zanah a nu leh pa te chu amah ngeiin Farkawn Biak Inah Baptisma a chantir ta a ni. Hemi rual hian Lal an nih laia an upate pawh Baptisma a chantir ve nghal a ni. Rawng a bawl ve chhung hian a bial atangin Pastor 4 an chhuak hman a, Pro-Pastror 7 a kaihruai hman bawk.
Pastor hna a thawh chhung hian mi 4561 a Baptist a, nupa tuak 376 a inneih tir bawk. Presbytery Moderator-ah vawi 7 leh Bial Chairman-ah vawi 22 a tang hman a, Synod Committee peng hrang hrang - Executive Committee-ah kum 17, Pastoral-ah kum 9, Sunday School-ah kum 6, Ramthar-ah kum 3, Music-ah kum 1 leh Nomination-ah kum 1 a tang tawh a ni. Synod aiawhin Manipur-ah vawi 1 palai tura ruat a ni tawh bawk.
Mautam tam a reh hnuah Chhippui leh Phuldungsei-a sawrkar Kudam-a buhfaite tha taka a tihral avanga lawmthu sawi nan Mizoram DC in Rs. 300/- a pe nghe nghe a ni. Tin, Saiip awm zawng zawng te pawh tiralin W.Phaileng Pastor Bial Typewriter hmasa ber tur an lei a ni.
Khawtlang hruaitute nen tangrualin W.Phaileng leh Sateek khuaah Middle School an din a. Rambuai avanga Khawbung Middle School leh High School tihtawp tawh din that lehna ah a bul tumtute zinga mi a ni.
Zemabawk Bial-a a awm chhungin Synod hriatpuiin Welfare Committee din a ni a. Hmeichhe awm khawlote enkawlna atan ‘Jeriko Khualbuk’ an din a, hetah hian mi engemawzat Baptisma a chantir bawk.
Rev. S. Lalhluma hi Kohhran ngaisang mi, Inkhawmpui rorel chu Pathian Aw-a ngai tlat mi a ni. Kohhran rawngbawltu ni tura Pathianin a koh duh avanga ‘rilru leh tihtak zeta rawngbawl hna hi thawh tur a ni’ tia ngai tlat mi a ni.