Sunday, May 29, 2011

THU & HLA KUTPUI KAN HMANG

23rd & 24th May, 2011 zan khan kan Branch chuan Thu leh Hla Kutpui kan hmang a, group tin ten kan item-te kan tihlawhtling thei vek a, a lawmawm hle. Kan Kutpui item pakhat atan Pathian thilsiam mawina tarlang thei thlalak chi hrang hrang te member-te thehluh chu phochhuah a ni a, thlalak chi hrang hrang 124 lai a rawn lut a, member ten kan hlut hle.

A zan khatna (Thawhtan zan)-ah hian group hrang hrang atangin thupui sawihona, mizo hla thanchhoh dan leh musical dance te entir a ngaihthlak a nih bakah Earphone ngaithla chunga zai ngaihnawm takte ngaihthlak a ni bawk.

Ni 24.05.11 (Thawhlehni), kan Branch dincham (47th Anniversary) denchhenin zing karah Biak In leh a vel tihfai hnatlang neih a ni a, member pawh kan thawkchhuak tha hle. Zan lamah Thu leh Hla Kutpui hman chhunzawm leh nghal a ni a, Anniversary puala Cake siam chu Branch Leader-in zaiphelin member inkhawm zawng zawng ten kan chang ho a ni. Group hrang hrang ten items - Male Voice, Musical Dance, Thupui sawiho, Short Drama te entirin ngaihthlak leh a ni a, chumai bakah zaithiam Nl. Zoramchhani’n min rawn hmanpui bawk.

Thu leh Hla Kutpui 2011 kan hman zawh tak hi member ten kan hlutin kan item thehchhuah te a hmuhnawmin a ngaihnawm hlawm hle a, hlawkthlak kan tiin zawngchhang tlak kan ti hle.

Thu leh Hla Kutpui Thlalak 001






Thu leh Hla Kutpui Thlalak 01








Thu leh Hla Kutpui Thlalak 1








Sermon (Thalai Aw 29th May, 2011 issue)

Tu nge ropui ber?“Nimahsela, kawngah chuan, ‘Kan zingah tunge ropui ber ang?’ tiin an lo inhnial tawh avangin an ngawi ta reng a...” Marka 9:33-37
C. Rosangzuala (ATC), Matthaia Group

Ropui ber nih tum hian he khawvelah hian mi tam tak an lo intlansiak tawh thin a. Alexander the Great te, Genghis Khan te, Hitler-a te leh midang tam tak te pawhin khawvela ropui ber nih tumin midang, anmahni aia chak lo zawk, thil tithei lo zawk te rapbetin he khawvel ropuina hi neih an lo tum thin. Chak lo zawkte hnuaichhiah leh rapbet a, engmah tithei lova siam a, chumi atanga mahni inchawisan hi khawvel mite’n ropuina an lo zawn dan a ni.

Ropui ber nih duhna hian mihring rilru hi a khat liam hneh hle a ni ang. Sigmund Freud-a chuan, ‘Thil kan tih reng reng chhan lian ber chu hmingthanna, ropuina kan duh vang a ni,’ a lo ti a. Mi tinin kan duh, hriselna te, ei leh in tur te, sum te, sumin a lei theih thil te, kan chhungkaw nun nawmna tur te, thil dang tam takte hi eng emaw chen chu kan nei thei a, kan nei bawk reng a. Thil pakhat erawh chu eng lai maha khawp khama kan neih leh kan hmuh ngai loh a awm. Chu chu Dr. Freud-a’n ‘hmingthan leh ropui duhna’ a ti a. Prof. William Dewey chuan, ‘mi pawimawh nih duhna’ a lo ti ve bawk. He mi rilru avang pawh hi a ni mahna Isua zirtirte pawh kha Kapernaum an panna kawngah khan ‘Tu nge ropui ber?’ tiin an inhnial!

Kan chang thlan hi chanchintha bu hmasa pathum te hian an ziak kim vek a. Chanchintha Marka ziakah chuan bung 9:33-37-ah kan hmu a, Matthaia ziakah chuan bung18:1-5, Luka ziakah bung 9:46-48-ah te kan hmu a ni. He thu hi Chanchintha Marka ziakah chuan Lal Isuan Ama hnungzuitu nihna kawnga a vawihnih zirtirnaah kan hmu a. Marka leh Luka ten hemi chungchang an sawi dan hi a inzul hle a, Matthaia erawh hi chu a dang deuh niin a lang. Matthaia ziakah hi chuan entirna atan Isuan ‘naupang’ a hman hi ‘inngaihtlawmna’ entirna tia hrilhfiah thin a ni tlangpui a; ni ngei pawhin a lang.

Marka ziak bikah hi chuan ‘naupang’ hi ‘rilru thianghlimna’ emaw ‘inngaihtlawmna’ entirna ai mah chuan mi hnuaihnung, puih ngai, mi chak lo, midangte hnena lawmman leh thil ropui engmah pek let tur nei lo te sawina niin a lang a. Heti laia Lal Isuan a sawi tum ber nia lang ta chu Ama hming avanga heng mi hnuaihnung leh chaklo zawkte chunga phut let leh lawmman beisei lova that chhuahtute hi mi ropui berte an ni tih hi a ni.

Kan tunlai khawvel hi han thlir ila, mihring hlutna leh dinhmun chu a thil lei theih zat atanga teh a ni ber tawh a. Pawisa ngah leh bungraw tha nei te chu mi ropui ti a kan sawi leh zah kai ber berte an ni ta. Midangte aia ropui kan tumna kawngah hian mahni hmasialna leh midangte pawisaklohnain kan mimal leh khawtlang nun a hneh tawh hle naah hian keini ringtute hi rawngbawl tura chhandam kan ni. Kan hlawkna leh lawmman kan hmuh lohna turah chuan mi dangte tana inpek hi thil har tawh tak a nih lai hian, hlawkna um lova midangte tana kan nun, hun leh thil neihte pek leh hlan hi kan rawngbawlna tur leh Lal Isuan Ama hnungzuina kawnga nun ropui a tih chu a lo ni si.

Hei hi Lal Isuan a zirtirte a zirtir, chanchintha ziaktute kal tlanga min zirtir a ni a. Chuvangin, kan tunlai khawvelah chuan thil har tak ni mah sela kan ni tin nunah, hna kan thawhnaah, thian kan kawmnaah, hausa leh rethei thliar lovin, kan tana hlawkna tur pawh awm lo mah sela mi hnuaihnung zawkte rawngbawl sak tura kan lo inpek tawhna hi chhunzawm zelin, theihtawp chhuahin rawng i bawl zel ang u.

Lalpan a thu malsawm rawh se.

Saturday, May 21, 2011

GROUP NEWS

Matthaia Group :
Ni 19 & 20. 5. 2011 (Zan) khan Pu Pathanga te Balu thiarin an inhlawh a, member te an thawk chhuak tha hle. Hetianga a huhova chet chhuahna siam saktu Pu Pathanga te chungah an lawm hle.

Marka Group :
Ni 22.05.11 (Pathianni) tlai dar 3:00 ah member tlawh chhuah an nei dawn a. Memberte in lama lo awm turin an inngen e.

Luka Group :
An lehkhachhe khawn te hralh turin an tifel mek a. Thu leh Hla Kutpui atana an inbuatsaihna pawhin a vawrtawp a thleng ta.

Johana Group :
Thu leh Hla Kutpui-ah ropui taka chet an tum a, member-te an phur tlang hle a, Nl. Mami supervise-na hnuaiah an item tur an zir tlur tlur mai.

Inkhawm (Thu & Hla Kutpui) & Branch Anniversary Programme

23rd May, 2011, Thawthan zan - Thu & Hla Kutpui Zan 1-na
A hmun  :  Kohhran Hall
Hruaitu  :  Tv. Zoramliana Hnamte, Br. Commtt Member
Tantu  :  Tv. Lallawmkima, Matthaia Gr.
Mihlate puala tawngtai  :  Nl. Caroline Lalruatdiki, Marka Gr.
Thilpek Hlantu  :  Nl. Lalruatsangi, Johana Gr.
Thu leh Hla Kutpui hman zui nghal a ni ang.
Hun kaihruaitu te  :  Pu David Lalrinawma leh Nl. Lalrinchhani Ralte, SML Comtt. Member te
Items  :
1. Headphone ngaithla chunga zai : Group tin atangin mipa 1 leh hmeichhia 1
2. Tawng hman dik chungchanga inkawmhona - Matthaia Gr.
3. Skit (Theme - Music than chhoh dan) - Luka Gr.
4. Hriatpui leh a thiante titi - Marka Gr.
5. Musical Drama - Johana Gr.

24th May, 2011, Thawhleh zan - Thu & Hla Kutpui zan 2-na leh Branch Anniversary
A hmun  :  Kohhran Hall.
Zai ho  :  Dar 6:30 – 7:00 pm
Hunserh  :  Pu R. Lalmalsawma, Br. Leader & Chairman, SML Sub-Commtt.
Items  :
1. Group zai - Matthaia Gr.
2. Inbiakna tawi - Luka Gr.
3. Musical Dance - Marka Gr.
4. Drama - Johana Gr.
           Branch Anniversary pualin Refreshment tuihnai tak buatsaih a ni ang.

Thu leh Hla Kutpui Thlirlawkna

Ni 23.5.2011 (Thawhtan) zan atang hian Thu leh Hla Kutpui hun kan hmang dawn a nih kha. He hunah hian en tur leh ngaihthlak tur hrang hrang a awm dawn a. Kan Kut hi hlimawm leh hlawkthlak taka hman tum a nih avangin kumin chu intihsiakna boruak hlipin hun kan han hmang ho dawn chu a ni a, member te kan phur thiam chuan zawngchhangthlak hle turah pawh ngai ila.

Headphone ngaithlaa zaiah hian Group tin atangin mipa pakhat leh hmeichhe pakhat, mipui hma a la zai ngai lo te, headphone a hla ngaithla chungin an rawn zai dawn a. Hei hi zai lama talent  inphumru haichhuah nana tih a ni a. ‘An thiam kan ti viau lo’ a nih pawhin kan hlimpui hle turah ngai ila! Thu leh hla-ah hian Group tin ten thu lampang item pakhat leh hla lam pang item pakhat an duh zawng zawng 15 mins. aia rei lo an rawn nei dawn a. He hun hmang tur hian Group te inbuatsaih thawm pawh kan hria a. Johana group te chu tuboh leh arra nen an hnatlan laiin, Luka group ho chu Art & Culture lamah an kal a, Matthaia group biru taka an inbuatsaih laiin Marka  group lam chuan All India Radio lamah Rehearsal an lo han nei leh daih.

Ni 24.5.2011 (Thawhleh zan) hi kan Branch KTP dincham a ni nghal bawk a. Zaithiam sawm bik te an zai dawn bakah thingpui leh a hmeh tui tak a awm tel dawn bawk. Kum 1964, May 24 (Pathianni) chawhma inkhawm ban khan Biak In (Primary School)-ah kal khawmin KTP hruaitu turte an thlang a. Hetih lai hian member 48 vel awm thei turah an in ngai a ni. Tichuan, ni leh thla te liam zelin, Pathian hruaina ropui tak dawngin, tunah hian member 790 vel kan lo awm thei ta a ni.

Thlalak phochhuah hi ngaihven hlawh leh hmuhnawm tur chu a ni. Ni leh thla, ram thla, pangpar leh thing, rannung leh mihring; thlalak chi hrang hrang za nufa zet chu he hunah hian phochhuah a ni dawn bawk a ni.

Kan chetvelna zawng zawng hi Branch Document turin Video Coverage neih a ni bawk ang. KTP member he hun hmang thei tura dam leh hrisel pangngai, hmundanga awm ni bawk si lo apiangte te tan chuan tel loh phal chi a ni dawn lo. Kan member hmundanga awm te pawh kha kan hrereng a che u, remchang hmasa berah in lo thlir ve theih turin video hi rawn pho chhuah kan tum dawn nia. 

Tual Upa thar kan nei

Kumin Aizawl East Presbytery-in min phalsak angin kan Kohhrana Tual Upa (Kohhran Committee Member) tur chu Ni 8.5.2011(Pathianni) chawhma inkhawmah khan Kohhran mipui ten kan thlang a. Pathum thlang chhuak tura phalsak kan nih laiin Lalpa'n kan mamawh tawk pakhat min pe a, Pu Lalnunmawia Hnamte chu Tual Upa atan thlan tlin a ni.

Pu Lalnunmawia Hnamte hi Thiak khua Pu Vanthanga(L) fapa niin, 1st March, 1966 khan a piang a. Kum 1983 khan Republic Vengah rawn awm tanin, tunah hian a nupui Lallawmkimi leh a fate 3 nen Upa Bial 6-na (Republic Venghlun) ah an khawsa mek a ni. Amah hi sawrkar hnathawk niin, DP&AR(CSW)-ah Assistant hna a thawk mek.

Rawngbawltu tangkai tak niin, Naupang Sunday School-ah hian Sacramen Dept. tih loh Dept. dang zawngah chuan a awm kim vek tawh a. Tunah hian Puitling Sunday School zirtirtu niin, Kristian Chhungkaw Committee-ah Secretary a ni mek a, Finance Commtt. leh Library-cum-Archive Commtt. ah te member a ni mek a, an awmna Upa Bial 6-na Commtt. Secretary a ni mek bawk a ni.

KTP-a a tel laia rawngbawltu tangkai a ni a. Group O.B post hrang hrang chelh tawhin, kum 1991-a Branch Commtt.-ah a tel tan a. Thalai Aw chanchinbu Editor hna hi kum 2 a lo chelh tawh a. Branch O.B post te chelh kim vek tawhin, kum 14 chhung teh meuh Branch O.B hna a chelh a. Bial KTP Treasurer leh Leader te lo ni tawh bawkin, kum 2007 khan kham lo tak chungin min over san ta a ni.

Tunah hian kan Kohhran hian Committee Member-ah : Pastor leh Pro.Pastor, Reverend pahnih, Upa 13 leh Tual Upa 1 neiin, an vaiin mi 18 kan nei mek ta a ni.

Article

Engnge i neih ?
F. Lalnuntluanga, Asst. Leader, Marka Gr.

Kawng kal mai mai lai a, ‘Engnge i neih?’ han in tih ngawt chu(h), mak duh tak a ni!  Mahse he zawhna tawite hi malsawmna ka dawnte min hriat nawn tirtu, ka tana zawhna hlu tak a lo ni reng mai. He zawhna tawi leh mawlmang tak, chhanna inang lo tak tak leh inpersan tak tak, a chhangtu mihring a zira a chhanna pawh danglam dawrh dawrh hian, engnge min zawh chhuah a, eng chhanna nge kan pek ve le?

Ni e, inngaihtuah buai miah lova, ‘Isua’ ka ti vat thei kha chu ka inchhuang ru ang reng a, ‘A dang engnge i la neih?’  ‘E le, ka hna ka ni tin eizawnna’, ‘Engnge a dang ila neih?’ ‘Ka la ngah mai a, mahse a vaia ka sawi chuan i ngaithla peih lo ang,’ kan han ti a, a zawhna ngai tho ‘Engnge a dang ila neih?’, ka nin deuh avangin a duh aia thui leh tul a tih vak loh thlenga chhan ka rilruk a. “Mihringin kan ni tin mamawh zualpui ang hi ka nei ve a (mite angin ngah le lu lo mah ila, ka ti kher a), nu leh pa, unau leh thian tha leh fel tak tak ka nei bawk a, chenna In, tui intur, thawmhnaw hak tur....”, ka ngaihhlut leh ngaihpawimawh te, ngaihpawimawh loh leh ho tak tak thlengin, a nin ve hrim hrim atan ka sawi teuh mai a, ‘A dang engnge i neih’ ala ti leh ta cheu mai! “Keima pual liau liau a enkawl tur sunday school naupang min pe a, chawhnu ah tleirawl 80 chuang enkawl tur min pe leh bawk”  ka tia, ka ka sawi belh leh teuh a.... ‘A dang engnge i la neih?’ a la ti fan!

Ka sa phat a, chubakah ka ning tawh bawk nen insum tulin ka hre lo a, “Ka neih zawng zawng hi chuti maia sawi zawh tham lekah i ngai a maw? tin, i bula sawi vek a tulna ka hre lo bawk, a nih leh nang enge i neih ve zawk a? I va hausa awm ve, engvanga he zawhna mawl tak hi min zawt nge i nih?” Ka awki pawh a sang sawt hle a, mahse ka insum duh bik lova (a mawl ka ti em a), mahse engahmah min ngai chuang lo, chu chuan ka thinrim a ti zual a. Ani lah chu ka thinrim tih hria awm pawhin alang lo, a zawhna ngai bawk, “Eng thil nge i neih?”, a bak thu dang engmah a sawi lo.

Mak tak maiin ka thinlungah ti hian a lo lang a. A ni tak e Lalpa, ka chhang seng lo, ka chhiar seng lo, ka chhang kim thei lo, neih nei lo emaw inti hian neih ka lo van ngah em! Ka neih zawng zawng hi ka sawiseng lo mai pawh a ni lo, hriat pawh ka hre kim lo! Engnge maw ka nih a heti em em a malsawmnaa min vur le Lalpa! He zawhna Engnge i neih? tih hi lo chhang ve chhin la ...
“Mak ti rengin i fak phawt ang - A petu”

Sunday, May 8, 2011

Sermon (Thalai Aw, 8th May, 2011 issue)

Lal Isuan a hmangaih che: i hmangaih ve em?
“Tupawh ka thupekte neia zawm chu mi hmangaihtu a ni, tupawh mi hmangaih chu ka pain a hmangaih ang, kei pawhin ani chu ka hmangaih ang a, a hnenah ka inlar ang.”  Johana 14:21
-  J.H. Zoena

    He thu hi Lal Isua sawi a ni a; “Nangnin mi hmangaih chuan ka thupek te in zawm ang,” (Joh. 14:15) a ti bawk. Heng thute hi Lal Isuan amah ringtu zawng zawngte min hrilh a ni. Lal Isua (Pathian) thupeka neia zawmtu chuan Lal Isua a hmangaih a ni. Tin, Lal Isua hmangaihtu chu Pa (Pathian)-in a hmangaih a, amah Lal Isua pawhin a hmangaih ang a, a hnenah a inlar dawn a ni tih min hrilh bawk. Tin, “Nangnin min hmangaih chuan ka thupekte in zawm ang” tiin min hrilh chiang nghal bawk a ni.
    Johana 14:21-a Lal Isua thusawi angin, Lal Isua leh a Pa hmangaihna dawng tak tak tur chuan a thupekte neia zawm a ngai a ni tih i hre reng ang u. Lal Isua thupekte zawm tur kan hriat theih nan, kan neih hmasak a ngai a nih chu. Lal Isua thupekte nei (hre) tur chuan, a neih theih dan kawng kan zawn peih a ngai a ni. Chu kawng chu Bible chhiar peih, Biak In-a inkhawm peih, Kohhran lenkhawmnaa tel peih, tawngtaia Lalpa biak tam peih, mahni dawn te sawi chhuah tam peih te a ngai a ni.
    Rom 10:14-a kan hmuh, “A thu an hriat lohva chu engtinnge an rin ang?” tih angin, Pathian ringa, a thupekte zawm nachang hriaa zawm tur chuan a thupekte hriatchian hmasak phawt a ngai a ni. Hetiang ni tur leh ti tur chuan kan sawi tak kawng hi taima tak leh rinawm taka kan zawh a ngai a ni, pumpelhna a awm lo.
    Deuteronomy 5:6-21-a kan hmuh thusawm pekte hi Pathian thupekte an ni. Tin, Leviticus 11:14-a, “Kei Lalpa, in Pathian ka ni si a; chuvangin intithianghlim ula, thianghlimin awm rawh u; kei ka thianghlim si a,” tih te hi Pathian thupek a ni; neiin i zawm ang u.
    A bikin naupangte leh thalaite tana Pathian thupek pawimawh em em mai chu, Ephesi 6:1-3-ah heti hian kan hmu – “Naupangte u, Lalpaah chuan in nu leh pa te thu zawm rawh u; chu chu thil dik a ni si a, i nu leh i pa chawimawi rawh, chu chu thupek tiam nei hmasa ber a ni. Chutichuan i tan a tha ang a, leiah hian i dam rei bawk ang,” tiin. He thupek zawm hi a va hlu dawn em!
    Evil leh Adama te atanga kan rochun sualna lak atang hian Lalpa lungawina khawpin mahni kan intithianghlim zo lova, a fapa Lal Isua felna chu kan felna leh a thlawna thiam kan chan theihna awm chhun chu a nih reng laiin, he khawvela kan la dam chhung hian Pathianin amah tih leh zah chunga a rawng bawl tura thu min pekte hi namnul tur kan ni reng reng lo. Rawngbawl tura chhandam kan nihna hi zau tak leh chiang takin chhut ila, Rom 12:1-2 thu hi vawngin zawm tlat i tum ang u.
    Lal Isua khawvela a lo kal chhan leh vana a lawn leh dawna thu min pek – Matthaia 28:18-20-ah leh Marka 16:15-16-a kan hmuh te hi nei ila, i zawm ngei bawk ang u. Nu emaw pa emawin a thih dawn tepa a tu leh fate thu a chah awm chhun (thurochhiah) chu a thu ngaih pawimawh ber a ni thin. Nu leh pa te thurochhiah ai pawha ngaih pawimawh ngai zawk, Lal Isuan amah ringtu zawng zawngte thurochhiah min hnutchhiah – “Chutichuan, kal ula, hnam tina mi zirtirah te siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin in hnenah ka awm zel ang,” tih hi hre rengin i zawm ang u.
    Lal Isuan a hmangaih che; i hmangaih ve em? - inchhut rawh le.
Lalpan a thu mal min sawmsak rawh se.

Group News

Luka Group :
Bawlhhlawh khawlna Polythene lei tur an la nei a, Group hruaitute hnenah ngaihven theih a ni.  Ni 7.5.11 zing karah lehkhachhia lakhawmin an hnatlang a. Lehkhachhia lo khawltute zawng zawng chungah lawmthu an sawi a ni.  Vawiin Pathianni tlaiah hian Group Committe member-ten Venghlun North lama KTP member te tlawh tur a ni a, member-te ina lo awm turin an inngen a ni. Committee member-te 3:00 p.m.-ah Tv. R.Lalrinawma te inah innghahkhawm tur a ni e.

Johana Group :
Ni 06.05.11 (Zirtawpni) tlai dar 5:30 khan Doordarshan Kendra, Durtlang-ah ‘Tunlai zirna kalphung thar CCE' chungchang sawihonaah hun an han hmang a. Inhlawhna siamsaktu, Pu Lalfamkima, Hmar Veng chungah leh tlawmngaia lirthei thawhtute zawng zawng hnenah lawmthu an sawi.

Article

I MAMAWH TAK MEUH EM ?

    Ni khat chu Mexico rama Sangha mantu khuaah hian lawng pakhat hi a rawn chawl ve nawlh mai a. Chuta rawn chuang zin khawthawng pa chuan sangha mantu ho chu rawn zawmin, an sangha mante chu a faksak luam a. Chu’ng sangha man tur chuan engtia rei nge hun a hman thin tih te a han zawt a, anni ho chuan rang takin, “Rei lo teah kan man mai” an ti mai a. Chu pa chuan, “Chuti chu engatinge tam deuh man tura rei deuh in awm mai loh?” tiin a han zawt leh a. Anni chuan an sangha man te chu an tan a tawk em em a, a bak man  a ngaih loh thuin an chhang leh mai a.
    “A nih leh a bak hun in neih zawng chu engtin nge in hman le?” tiin a han zawt leh a. Anni chuan, “Kan mu a, naupangte nen kan infiam a, kan nupuite kan awm pah bawk a. Tlaiah kan thiante hmu turin khuaah kan han kal a, tingtang te perhin kan zaiho a, tichuan nun chu a nuam a ni mai” an tih lai chuan khualzin pa chuan lo zawm lehin “Harvard University atangin MBA ka zo chiah a, ka pui thei ang che u. Tun atang chuan ni tin in sangha man chhung tirei deuh ula, sangha pawh tam zawk in man ang a. Tichuan, sangha in mamawh bak chu in hralh ang a, lawng lian zawk te pawh in lei thei ang chu” a han ti a.
    Sangha mantute chuan a hnua an tih zel tur an han zawt leh a, ani chuan, “Lawng lian zawk in lei belh zel ang a, sangha manna lawng rual in neih hnu chuan tuna in hralhna mai hi ni lovin, a sa sawngbawlna hmunah te in kalpui thei tawh ang chu, nangmahni pawhin chutiang sa sawngbawlna pawh chu in nei ve thei mai ang” a han ti leh a, “Tichuan, khawpuiah te kalin Mexico City-ah te, Los Angeles-ah te, New York thleng pawhin in sumdawng thei ang a, in khaw te tak te hi chu in pemsan thei mai ang” tiin an tih leh zel tur a sawi zawm zel a.
Sangha mantute chuan, “Chu chuan hun eng chen nge a duh ang?” tiin an zawt let ve thung a.
    Khualzin pa chuan, “Kum 20 atanga 25 vel a niang” tiin a chhang ve mai a; “Tichuan, in sumdawnna te chu a len hun chuan Stock Market-ah share te in leiin in hralh ve ang a, Dollar maktaduai tam tak in hlawh chhuak tawh mai dawn a ni” tia a han sawi chhunzawm leh chuan sangha mantute chuan, “Chutia dollar maktaduai kan neih hnuah chuan engtin zel nge?” tiin an la zawt leh ta zel a. “Chumi hunah chuan in hahchawl thei tawh ang a, thingtlang hmun fianrial takah in nupui fanau te bulah nuam takin in infiamin in thiante nen pawh hun nuam tak in hmang thei tawh ang chu” a han tih leh chuan, sangha mantute chuan, “Ka pu, tuna i sawi ang kha kan nun hman lai mek ang hi a ni a, chuvangin tul hauh lova kum 20 chuang hmanral chu a tulna kan va hre love” an ti ta mai a.
    Ngaihtuah teh - tuna neih i tum lai mek kha i mamawh nge i duh chawp le?.. Chhandamna pawh hi harsa taka hlawh chhuah ni lovin awlsam taka neih theih a ni asin!

Friday, May 6, 2011

KTP Inkhawm : Joint Service

Bial KTP ruahman angin karleh thawhtan Ni 9 May, 2011 zanah hian kan Branch chuan Republic Vengthlang Branch kan tlawh dawn a, programme hetiang hi a ni e -

Kristian Thalai Pawl
Republic Veng Branch  &  Republic Vengthlang Branch
Joint Service Programme
9th May, 2011 (Thawhtan) Zan

INKHAWM PROGRAMME
A hun  :  9th May, 2011, Zan dar 7:00
A hmun  :  Republic Vengthlang Kohhran Biak In
Zai hruaitu  :  Pu R. Laldinpuia, Republic Vengthlang Br.
Hruaitu  :  Pu Malsawmtluanga, Leader, Republic Vengthlang Br.
Tantu  :  Nl. M.S. Dawngkimi Ralte, Commtt. Member, Republic Veng Br.
Secretary Reports  :  Republic Veng Br. & Republic Vengthlang Br.
Zaipawl  :  Republic Veng Kohhran Zaipawl  &  Republic Vengthlang Kohhran Zaipawl
Thusawitu  :  Pu R. Lalmalsawma, Leader Republic Veng Br.

FELLOWSHIP PROGRAMME
A hun  :  Inkhawm ban
A hmun  :  Republic Vengthlang Kohhran Hall
Zai hruaitu  :  Tv. Lalrinfela, Republic Vengthlang Br.
Hruaitu  :  Pu Danny Lalremmawia, Fin. Secy. Republic Veng Br.
Items :
1. Solo  –  Nl. Melody Zothansangi, Republic Vengthlang Br.
2. Solo  –  Tv. Lalbiaksanga, Republic Vengthlang Br.
3. Female Voice, Republic Veng Br.  (Convener : Tv. Lalthazuala Br.C/M)
4. Male Voice, Republic Veng Br.  (Convener : Tv. H. Lalthansanga Br.C/M)
Thusawi (10 mins.)  :  Pu R. Lalhmingthanga, Asst. Leader, Republic Vengthlang Br.
Inhmelhriattirna  :  Branch pahnih Asst. Secretary te

Kan Branch KTP member zawng zawngte i inkhawm theuh ang u.

Wednesday, May 4, 2011

Photo Display

Ni 23 & 24 May, 2011 a Thu & Hla Kutpui kan hman turah thlalak phochhuah (Photo Display) buatsaih a ni dawn a. He thlalak phochhuah hi inelna zawnga kalpui a ni dawn lova, member a duh apiang ten thlalak thehluh theih a ni. SML Sub-Commtt. atanga rawtna te Br. Commtt. chuan a ennawn leh hnuah hetiang hian ruahmanna a siam -

1. Thlalak len zawng (size) chu 4" x 6" a ni tur a ni.
2. Pathian thisiam mawina pholang thei tur eng pawh (ram thla, rannung, ramsa, thing leh mau, tlang leh lui, etc.) a huam thei ang.
3. Mihring awm phung tarlanna thlalak pawh huam tel thei tho mah se he thil hi fiamthu nana hman loh tur a ni a. Fiamthu lam hawi thlalak chu phochhuah ve a ni lovang.
4. Camera engang nge hman a nih ziahlan nise.
5. Thlalak te edit loh tur a ni.
6. Thlalak hming emaw a nihna tawi emaw ziahlan nise.
7. Thlalak thehluttu hming leh awmna Gr. ziahlan tur a ni.
8. Mahni lak ngei thlalak thehluh nise. Mi pakhatin thlalak pakhat aia tam pawh thehluh theih a ni.
9. Thlalak te hi 16th May, 2011 hmain SML Sub-Commtt. member te hnenah thehluh tur a ni.

Member atam thei ang berin thlalak thehluh tum ila. Aizawl pawn lama kan member te pawhin a thehluh ve theih reng a, kan chhungte emaw thiante emaw kaltlangin Aizawl pawn lama member te pawh kan tel ve theih chuan a lawmawm hle ang.

Sunday, May 1, 2011

Sermon (Thalai aw, 1st May 2011 issue)

Thlarau hruaia awm
‘Amaherawh chu tupawh Krista thlarau nei lo chu Amaha mi a ni lo.’ (Rom 8:9)
Zothantluangi, Johana Group

Israel fate chanchin kan chhiar chuan, Aigupta ram atanga Pathianin a hruai chhuah thu te, Kanan rama ropui taka ram a dinsak thu leh a hnua sala an tan dante pawh kan hre awm e. Heng zawng zawnga chiang taka thil pakhat lo lang chu - Israel fate hi Pathian laka hel hmang tak an ni tih hi a ni. Pathianin thilmak ropui tak tak a tihsak thin a. Mahse hun a lo kal chuan chung a tihsak zawng zawngte chu theihnghilh lo mah se, Pathian tana inserh thianghlim harsa an ti telh telh a, thil dangin an rilru leh ngaihtuahna a hip na telh telh a, a tawpah milem Pathian nen an chawhpawlh leh ta mai thin a ni.
Kan ram Kristian nun leh mahni nun theuh pawh hi inen ila, Israel hnam ang tho hi kan ni awm e. Mizo chu ‘Za a za Kristian kan ni’ tiin kan inchhuang em em a. ‘Lalpa chu ka Pathian a ni’ ti reng chung si hian amah zui tak tak te chu harsa kan ti em em a. A chhandamna changa piangthar te lah hian zu leh ruihhloah kan tluksan fo a, mipat hmeichhiatnaah lah kan insum thei hek lo. Mi tam tak phei hi chuan sum leh pai hi kan pathian ta berin a lang. Khawvel mite nena danglam tura koh hran zinga serh hran rawngbawltute ngei pawh a chunga kan sawi takah te khian kan insum thei bik lova, kan mualpho ta fo a nih hi.
Kan chenna khawvel hi danglam thin mahse, Israelte Pathian, kan Pathian hi a la ngai reng a, a thupek pawh a la ngai reng a ni. Min hmangaih em avangin Amah kan hmangaih let ve hi a phut tlat a, kan taksa, rilru leh thlarau hi a duh a ni. A aw ngaithlaa a thlarau hruaia awm reng turin min duh a ni. Thlarau hruainaah chuan ringtu chuan a duhzawng leh chak zawngte, a pianpui mizia nen lam kalsan a ngai thin. Pathian duhzawng tihpuitlin nan a peih emaw peih lo emaw a tul apiang a tih a ngai tawh thin.  Lalpa hmangaihte chu a hmangaih ve a ngai tawh a, a ngaihtuah ngai loh ni mahse, Lalpa ram zauh hna thawh chu a thahnem ngaihna tur lian tak a lo ni tawh thin.
Kohhrana rawngbawlna peng hrang hranga kan mawhphurhna te hi hlen chhuak vekin, inkhawm te, hnatlang leh committee zawng zawng te hi ti vek mah ila, thlarau hruaina hnuaia tih a nih si loh chuan Pathian tan chuan rimchhia a ni tho ang. Kan Pathian hi a duhtui a, Amah tihna tel lo inthawina ai chuan thuawihna a duhzia pawh Bible-ah kan hmu.
Hun rei tak rawngbawlna a lo inhmang tawh tan phei chuan thlarau hruaina aw laka beng lo chhut ngawng mai hi a awl thin. ‘Ti ve tawh, hre ve tawh’ ni a inhriatna kan lo nei a, chu chuan thinlungah chapona a rawn tuh a, Pathian rawn lova, mahni ngaihdan kal tlangpui ngutnaah min hruai lut thin. Hei hian mahni duhtawk chin chiaha rawngbawl tumnaah min hruai lut a, chu chu kan nunah, kan tawngkam leh kan rawngbawlnaah a lo lang chhuak thin.  Rawngbawlpuite zingah ei loh kan nei a, chhandamna changa piangthar te hmel pawhin thinlung a khawi che zo tawh thin lo. Mahni tha leh tling tawk ni a inngaihna atang chuan thlarau hruaiin a awm theih lova, rawngbawlna a nung thei lo a ni.
Kan nun chhungril a hlim loh chhan te, thil tha lo a ni tih kan hriat kan tih leh mai thin nachhan te hi thlarau hruaia kan awm loh vang pawh a lo ni reng thei. Pathian thlarau chuan a hmasa berin hmangaihna, a dawtah beiseina leh zalenna a pe si thin a.
Israel fate anga thununna kan tawh hma hian kan dinhmun i inenfiah ang u. He khawvelah thil chi hrang hrangin thlarau hruaia kan awmna tur min lo dal mai thei. Mahse, chung kan chaklohna zawng zawng chu Pathian min mamawh tirtu an nih avangin, ‘Ka  chak loh apiangin a ni ka chak thin ni’ kan lo ti thei tawh ang. Kan khawhmuh nan mit a pawimawh angin, Kristian khawhmuh nan hian thlarau thianghlim aw hi a pawimawh em em si.
Thlarau thianghlim hruaia kan awm theih nan LALPA’N  mal min sawm rawh se.

BIAL KTP THISEN PEK

       Kistian Thalai Pawl, Republic Veng Bial chuan kan kum 25-na (Silver Jubilee) denchhenin Ni 30 April, 2011 (Inrinni) khan Republic Veng Kohhran Hall-ah,  Presbyterian Hospital, Durtlang-a a mamawh apiang te hman turin Thisen Pek Runpui (Blood Donation camp) kan buatsaih a. Bial chhunga KTP member thahnem takin thisen kan pe a ni. Zing dar 10:00 ah hun hman tan a ni a, Pu Lalhmunsanga, Bial KTP Leader chuan hunserh hmangin a tawngtai a, chumi zawhah thisen pek hi tan a ni. Thisen pe zat chu hetiang hi a ni e -
Republic Veng Branch  -  Mipa 56  +  Hmeichhia 22  =  Total  78
Upper Republic Branch  -  Mipa 20  +  Hmeichhia 2  =  Total  22
Republic Vengthlang Branch  -  Mipa 19  +  Hmeichhia 8  =  Total  27
Total  -  Mipa 95  +  Hmeichhia 32  =  Total  127
       Member hetiang zat lai maiin thisen kan pe thei hi a lawmawm hle. Hei mai bakah hian thisen pek tuma rawn kal, taksa lam harsatna engemaw vanga pe thei ta lo pawh member engemaw zat an la awm bawk a. Member zawng zawng te inpekna a lawmawmtak zet a ni.

Bial KTP Thisen Pek thlalak 3






Bial KTP Thisen Pek thlalak 2






Bial KTP Thisen pek thlalak 1








Group News

Luka Group :
Bawlhhlawh khawlna Polythene lei tur an la nei a, Group hruaitute hnenah ngaihven theih a ni. Ni 7.5.11 zing karah lehkhachhia lakhawma hnatlan tur a ni a, member-te an inhriattir a ni. Group huam chhunga chhungkaw tin te lehkhachhia lo khawl turin an inngen. Ni 1.5.’11 (Pathianni) tlaiah Group Committe member-ten Field veng huam chhunga KTP member te tlawh tur a ni a, member-te ina lo awm turin an inngen a ni. Committee member-te 3:00 p.m ah Tv. Lalnunpuia te inah innghahkhawm tur a ni e.

Johana Group :
Ni 29.04.11-a Doordarshan Kendra, Durtlang-ah ‘Tunlai zirna kalphung thar - CCE' chungchang sawihonaa hun an hman tur kha ni 06.05.11 (Zirtawpni) tlai dar 5:30-ah sawn a ni a. Live Telecast tur a ni a, member ten lo thlir ngei turin an inngen a ni.

KTP Inkhawm Programme

2nd May, 2011, Thawhtan zan

A hmun  :  Kohhran Hall
Hruaitu  :  Nl. Rebecca Lalrotluangi, Br. Commtt Member
Tantu  :  Tv. R.K Luimawia, Johana Gr.
Tawngtai rual  :  Mi hlate, Missionary te leh May thla chhunga chanvo nei te tan
Thupui zirho tur  :  ‘Mizo tawng hman dan dik’
Thupui sawitu : Tv. C. Malsawmtluanga, Editor, Thalai Aw
Sawihona hun hman a ni bawk ang.
Thupui zir tur hi Branch hrang hranga zir turin Central KTP atanga rawn buatsaih a ni.

Branch Committee Thurel

Ni 28.04.2011 (Ningani) zan khan Branch Committee vawi 5-na neih a ni a, chuta thurel tlangpui chu hengte hi a ni e -

1.  Bial KTP Bookmark chungchang : Bial KTP-in Silver Jubilee puala Bookmark a siam, kan Branch zawrh tura min hlan (390 pieces) chu Group-ah sem darha zawrh nise; hralh bang a awm chuan Branch suma khulh mai nise.
2.  Branch Golden Jubilee document : Archive & Documentation Sub-Commtt. atanga rawtna, kan Branch Golden Jubilee document atana Br. hruaitu hlui - Rev. Lalpianga, Upa Zalawma leh Pu H. Zakhawla te video interview neih chu kan remti. Bial KTP Souvenir-a tarlan tur kumin Br. Commtt. thlalak chu Ni 01.05.2011 Fellowship banah neih nise kan ti.
3.  Branch Anniversary & Thu leh Hla Kutpui : Ni 24.05.2011 hi kan Branch dincham (anniversary) a ni a. Hemi pual hian zingkarah Biak In leh a vel tifaiin Branch Hnatlang neih nise. Zan lama Thu & Hla Kutpui hman hunah thingpui & a hmeh buatsaih nise, Refreshment Sub-Commtt. in lo buaipui se kan ti.
4.  Thisen pek chungchang : Branch KTP hminga a mamawh te tana Thisen Pek nise; a hun tur leh pekna tur chu la ngaihtuah that leh nise kan ti.
5.  KTP Presbytery Meet Item : Ni 12-14 Aug. 2011 chhunga Salem Veng Kohhran Biak Ina KTP, Aizawl East Presbytery Meet neih turah kan Bial atanga item pakhat Live Band neih tur chu Bial KTP Commtt.-in kan Branch kuta a dah angin hma latu (Convener) atan Pu John Lalremruata, Br.C/M kan ruat a. Ani hian band member tur leh hla sak turte lo ruahmanin Br. Commtt.-ah rawn thlen leh se kan ti.
6.  KTP Room furnishing chungchang : KTP Room-ah hian carpet thar phah nise, frame hunna siam bakah dawhkan thar siam nise. KTP Go-down ah chhuar siam bakah exhaust fan (a tul dan angin) vuah dan ngaihtuah bawk nise.
7.  Republic Vengthlang Branch tlawh : Bial KTP ruahmanna anga Ni 09.05.2011 (Thawhtan) zana Republic Vengthlang Branch kan tlawh tura kan Branch item turah sum sen tulna a awm chuan Branch-in tumsak nise.
8.  Member tlawh chhuah : Branch Commtt. ten member tlawh chhuah kan neih tur a thawh khatna atan Matthaia Gr. huam chhunga member te Ni 15.05.2011 (Pathianni) tlai dar 3:00 ah tlawh nise.