Sermon (Thalai Aw, 6th March, 2011)

Rinna

“Tin, rinna hi thil beisei te awm ngeia hriatna, thil hmuh lohte hriatfiahna a ni”
(Hebrai 11:1)

Peter Lalnunhlima

Br. Commtt. Member

Tirhkoh Paula te Phillippi khuaa lung Ina an tum khan Pathian hnathawh nasa takin a lo lang a, tan In kawngkharte Pathianin a tihchhiat sak a, an kawl bunte pawh a tlak tir vek tih kan hria. Kha tan In vengtu khan Pathian hnathawh mak tak mai a hmuh khan Chhandam nih ve a duh ta hial a nih kha! Tirhkoh Paula chuan, “ Lalpa Isua ring la tichuan chhandamin i awm ang, nang leh I chhungte nen,” a ti a ni. Keini pawh chhandam kan nihna chhan chu Lal Isua Krista kan rinna hi a ni.
Amaherawhchu, keini rinna avanga khawngaihna a chhandamte hian, Lal Isua ringtu kan nihna hi he khawvela kan thil tawn hrang hrangah leh kan khawsak phung hrim hrimah te, harsatna leh manganna chi hrang hrang lo thlen hunah te hian Pathian kan rinna hi a lang chhuak lo fo thin. Kan harsatna tawhah te, thlemna leh manganna kan tawhah te, kan nitin nun hrim hrimah hian Lal Isuaa rinna nghah a, a hnathawh lo lang tur nghak veng veng mai tur kan nih lai hian, kan rilru a hah a, buai phili a kan lo mangang viau zel hi kan inenfiah a tul hle awm e. Kan Lal Isua hi kan ringhlel nge, kan ringlo hrim hrim, i inngaihtuah chiang teh ang u.
Kan hmalam hun leh kan thil tawna kan buainaah te pawh Pathian kuta innghat chunga kal ai chuan keimahni kan inringtawk hmasa a. Pathian aw ngaithla hauh lovin kan thiam ang tawkin kawng kan in zawn chiam mai thin a, a tawpah buaina ata buai leh zualnaah kan tlu lut fo thin. Engkima kan engkimah hian Pathianah rinna i nghat ngam phawt ang u, tah chuan inchhirna tur a awm ve lo. A tirah bumbohin rualrem lo angin lang mah se, a tawpah chuan fel fai taka hlen chhuahin a awm thin. Tlai leh muang angin lang thin mah se, a hun takah a lo thleng thin.
Thenkhat chuan Pathian hnenah chuan rinna kan han nghat chhin thin tak na a, mahse kan rin angin Pathian chu alo che leh si lova, kan vui a Pathian hi kan thiam lo zawk lek lek thin. Pathiana rinna nghat tak tak chuan an chungah an duh loh zawng tak pawh thleng se Pathianin an thatna tura a remruat a ni ang tih an ring nghet tlat a, nun hahdam takin thil tha lo ni a kan ngaih pawh an tuar thin.
“Rinna chu thiltih nei lovin amah chauhin a awm chuan thi a ni” tih Jakoba lehkhathawn bung 2:17-ah kan hmu. Pathian ringtute hian kan rinna hi a thih loh nan, thiltih leh tihtak zeta lanchhuah tir i tum ang u. Sam 37-ah khan engtin nge a inziah, “I awmdan tur chu Lalpa chungah nghat la, amah chu ring la aman a then then a ti ang” a ti lo, “I awmdan tur chu Lalpa chungah nghat la amah chu ring la aman a ti vek ang” a ti zawk. Pathian chuan a then then emaw a zatve lekin emaw hlen chhuak lovin emaw min thawh sak dawn lo, kim tak leh zo fel fai takin a hlen chhuak dawn. Chuvang chuan Pathian hi ring mai tur kan ni.
Tin, Pathiana rinna nei tak tak mite chuan engkim chan huam leh thih huamin Pathianah rinna an nghat. He khawvela an thil neih hlu ber chan mah sela a let tam tak aia ropui zawk an hmu let dawn tih rinna nghet tak an neih avangin he khawvel ropuina leh nawmna ngainepin hrehawm tuar an hlau lo. Mosia khan Pathian hre loa reilote atana ropuina leh nawmsakna chen ai chuan Pathian mite nen tihduhdah tuar a thlang zawk a, chu tawrhna chu rosum tam takah a chhiar zawk a ni. Nakina chatuan atan a ropuina leh a lawmman tur a awm a ni tih rinna lian tak a neih vang a ni.
Keini ringtute hian thil kan hmuh theih lohte hi a awm ngei a ni tih rin a, kan beisei tlat chuan kan ring thlawn dawn lova, engtik niah emaw chuan kan rinna hi tihfamkimin a la awm dawn a ni.
Lalpan a thu malsawm rawh se.