Sermon (Thalai Aw, 25th April, 2011 issue)

Keima hnenah pawh a inlar ve!

“ Tin, a tawp berah chuan a hun lova piang ang, keima hnenah pawh a inlar a."

Upa Lalthianghlima

Vawiin kan Lal Isua Krista thawhlehna ni ropui takah hian, Thawhlehna hmahruaitu, tho leh Lalpa inlarna dawngtute atang hian, kan hnenah pawh tho leh Lal Isua hi a inlar ve em? tiin, heng thute hian keimahni theuh i inen ve teh ang u.

Ka Lalpa an kalbo pui ta : Isua thlan bula Mari Magdalini tah hla chu, “Ka Lalpa an kal bopui ta, an dahna chin ka hre si lova,” tiin Mari chu lungchhe em emin a tap rawih rawih mai a. Mari tah chhan en hian a runthlak hle a ni. Hmangaih berte awmna chin hriat loh chu thil buaithlak tak a ni ang. Kan duhtak leh ngaih ngawih nghawih te chin hriat lohva an awm chu a hrehzawm zia kan hre theuh ang. Mari ang hian kan tap ve ang.

Duhtak leh ngaih tak te nena inthen chu mi a ber pawhin hrehawm kan tiin tuar harsa kan ti thin. Mari hian a Lalpa awmna nia a hriat chian ber thlanah a awm si lova, khawharin a tap ngawih ngawih mai niin a lang. Isua ngaina a, hmuh tuma kal te hian Isua hmuh an tum dan a dik lo a ni. An Lalpa chu thihna phuar chungin hmuh an tum a, mahse an hmu lo.

Engatinge mitthi zingah minung in zawn? : Isua zuitute hian engatinge an Lalpa thusawi an hriat theih loh le? Puithiam lalte, sorkar hotuten Isua thawhleh tur thu te hriain thlante an ventir a, amah zuitu Zirtirten engatinge Isua ruang hmuh an tum talh le? Chutiang chuan Mari-te hian Isua ruang hnawih tur rimtuite kengin thlan lam an pan a ni.

Isua thlan an thleng chu thlan chu a lo ruak a, an buai hle mai. Mahse, Vantirhkoh-in Mari te a lo hmu a, “Engatinge mitthi zingah minung in zawn? Hetah a awm tawh lo, a tho leh tawh” a lo ti a. Hriak rimtui hmanga Lalpa hi cheimawi chi a ni lo. Lalpa hi kan thil neih hmanga tih rimtui mai chi a ni lova, mitthi zingah minung khung rei chu Lalpa'n rem a ti lo, thihna ata kaihthawh leh chu Pathian thil tum a ni si a.

Vawiin thleng hian mitthi zingah minung Krista hi zawng kan la awm em? Tho leh Lalpa hi khawvel thila tih rimtui theih a ni lo, rimtui sa a ni e.

Isua hmangaihtute hnenah a inlar : Isua hmangaiha ngainatu, a ruang dai pawh thlahlel hnenah 'Mari' tiin a hming ngeiin a kova, a Lalpa ngei a ni tih a inpuang. Vawiin thlengin Isua ngainatu, a tel lova khawsa thei lote hnenah a inpuangin a inhriattir thin a, nungin a inentir reng a ni. Mari pawhin 'Rabboni' tiin a zirtirtu chu a ko nghal a, beramte chuan Lalpa aw an hre thin a ni. Amah Lal Isuan min hmangaih avangin keini kan chian loh lai pawhin kan hmingin min ko thin a, “Ka ta in ni asin” min ti.

Zualko-ah an tang thin : Thlan kal ten thlan ruak tih leh a thawhleh thu hria a an hnen ngeiah pawh a inlar hnu chuan a thawhleh thu midang hrilh turin tho leh Lalpa'n zualko tura a tirh Mari-te chu an kal thuai thuai a, “Lalpa chu a tho leh ta” tiin an hrilh darh ta a ni.
    Hmanlai Kristian hmasate chuan chibai buk nan “Lalpa chu a tho leh ta” tiin thu hmasa berah an neih thin an ti. Vawiin thleng hian Isua inlarna dawngtu zawng zawngte chu thawhlehna thu, Isua a nung reng tih thu hi kan tlangauna hla a ni a. Hman hmawh taka Zualko tlan anga tirh kan ni e.

I hnenah Tho leh Lapa hi a inlar ve em? : Tirkhoh Paula chu Juda biak danah sakhaw mi, thahnemngai em emtu, kristian Isua zuitute haw em emtu, tiduhdahtu, phuar chunga Jerusalem panpui thintu a ni.

Chutianga Kristiante an man lai chuan Isua nen a intawk ta thut mai a. Isuan “Saula, Saula engatinge mi tihduhdah” tiin Paula hnenah Isua a inhriattir a, kaih ngai khawpin khaw hmu lovin a lo awm ta a, a lo piangthar ve ta a ni. “A hun lova piang ang keima hnenah a inlar” tiin piang tlai intiin he thu hi a lo sawi ta a ni.

“Rochan chhe thei lo in tan vanah dah a tiam a ni” tiin lehlin thar chuan a ti. A va ropui em! Thildang beisei tur kan nei lo; lawmna tur dang zawn pawh a tul lo. Isua tho leh Lalpa hi kan hnenah a awm reng a, chu ro chu kan tan peih diamin, Lalpa'n min pe a ni. Tholeh Lalpa hi i hnenah a inlar ve em?

Lalpa’n malsawm rawh se.