Sunday, July 24, 2011

Sermon

Thalai Aw : 24th July, 2011


Khawi kawng nge i zawh thin le!
        I kawng zawng zawngah amah hre reng la, i kawng chu a kawhhmuh zel ang che. Thufingte 3:6
R. Lalremruata, Luka Group

Ringtu nun hi a chhuk chhovin, a nuam leh hlimawm ringawtah a tawp mai lova. Thlemna, harsatna leh tawrhna tam tak paltlang tur a awm thin. Engkim hi kan ta a nih tlat avangin hlim lai leh lungngaih laite, nawmsak lai leh hrehawm tam tak tawrh a tul hun pawh a awm thin. Heng harsatna hrang hrang hi mihring chakna leh theihna hmanga do let chi a ni lova, tam tak phei chu chunglam fiahna hmanrua pawh a ni thei. Heng hun a lo thlen hian ringtu tam tak chu kal ngaihna hre lovin vanduai leh tuar bik riau a inhriain Pathian lakahte an vuivai a, piangthar tha, lamtual thleng thlenga amah faka ban phar tawh te leh rawngbawltu tha ni a ngaih tawhte pawh beidawnna ruamah an tlu lutin sual lamah bawk an hawi kir leh thin.

Kristian piangthar tha tak chu heng hunah hian fimkhur taka kalin, Tirhkoh Paula’n, “Ka chak loh a piangin a ni ka chak thin ni” (II Kor 12:10) a lo tih angin chung harsatna leh kawng bumboh chu anmahni intih chakna hmanruaah hmangin Pathian rawn chungin tawngtaina nen an hmachhawn a. An  tawrh chhuah meuh chuan chung an harsatna chuan a tilawm a, anmahni a tichak tharin kal zel dan an thiam phah zawk thin.

Kristian piangthar tha dik tak chuan khawi kawng pawh zawh se, a nunah Pathian hmel a lang tur a ni. Ni tin hnathawhna te, intihhlimna hmun leh mahni pindan chhungrila an awm laite, khawtlang  thil tihnaa an tel vena hmun leh zin veivahna thlengin ringtu piangthar a nihna a lang tur a ni. Malsawmna petu Pathian dah chungnungin hmahruaitu leh hnungdawltuah a hmang tur a ni. Tichuan, rinna kawngah thangduang zelin miten amahah rah tha eitur an hmu dawn bawk a ni. Chutiang ni lova, a awmna hmun leh thil tawn a zira fimkhur lo taka a kal a, a duhzawng, ngainat zawng, chak zawng leh nuam tih zawng ang anga a kal mai mai chuan a ngaih a sam tial tial ang a, dik inti si lo, inthiam chawp siin a awm tual tual ang a, dinchhuah leh harsa khawpin kal ngaihna hre tawh si lovin a lo tlu sawp leh mai dawn a ni. “Kristian kal fimkhur rawh, hlauhawm a hnai..”(KHB: 405)

Thlemna leh harsatna hrang hrangte hi ringtu nun kawnga kan paltlang tur a nih rualin, heng harsatna kan tawh tam tak hi chu kan zawh loh tur kawng kan zawh a, kan dai loh tur ram kan dai thin vang leh keimahni duhzawng thlahlel a chawtak awmna, chunglam hruaina kawng lam zawh lova kan tih loh tur kan tih tam lutuk vang pawh a ni thei.

Beram chu a neitu (a pu) hmuh phak lova a tlat fal chuan khamah te tlain, sa ten a seh phah thin. Chutiang chuan piangthar tawh pawh a awm lohna tur hmun - zu leh sa hmun, nulat tlangval nawmchen na hmunah te, thianghlim lo taka sum leh pai hai luhna leh thil tha lo hrang  hrang lam kawng zawh a, amah neitu Pathian hawisana a tlat fal fo chuan, a tum lawk leh duh reng vang  ni lovin, a awmna hmunin a zir miau loh avangin, setana’n thlemna hrang hrang hmanga ei ralin, a duh aia thuk khuarkhurumah a tla let leh vawn vawn a, talchhuah a harsa leh hle tawh hin.

Chuvangin, piangthar tawh chu khawi hmunah pawh kal se, Pathian biak inkhawm a thlahthlam tur a ni lova, Kohhran Biak In awm mumal lohna pawh ni se, Bible chhiar leh tawngtaiin tan a la tur a ni. Tualchhung Kohhrana a biak Pathian tho kha hmundangah pawh a Pathian a ni tho si a. “Lalpa mit chu hmun tinah a awm a, thil tha lo leh tha a enthla reng thin” (Thuf. 15:3). Chuvangin piangthar, chhandamna chang tawh kan nih chuan chaw tak awmna leh kawngzawh tur dik Kohhran mite inpawl khawmna Biak In lamah kan awm tam tur a ni. ‘Thenkhat tih dan anga kan inkhawmte bansan lovin, infuih tawh zawk ang u’ (Heb. 10:25).

Chutichuan, khawi hmunah pawh fimkhur taka kalin, kan zawh tur kawng dik tak kan zawh theih nan LALPA’N malsawm rawh se.

No comments:

Post a Comment