Sunday, November 13, 2011

Sermon (Thalai Aw, 13th Nov.2011 issue)

Kawng dik chu kawhhmuh rawh u!
“Naupang chu a kalna awm kawngah chuan zirtir ula, a upat hun pawhin a thlah lo vang.” (Thufingte 22:6)
Danny Lalremmawia, Fin. Secy, Branch KTP

He khawvel kan khualzinna ram, kan dam chhung rei loteah hian mihringte hian mamawh, duh leh it zawng kan ngah em em mai a. Chumi nei tur chuan nasa takin kan bei thin a. Khawvela kan cham chhunga ‘ro’ ni a kan hriat te hian mawina a nei rei lo a, hlutna a nei rei hek lo. Amaherawhchu, Lalpa laka kan rochan fanaute hi chu kan thih hnu pawha vanrama kan chhawm theih te an ni a. Dam chhung tawite mawina hian kan ‘rohlu’ dik tak te hlutna hi min hmuh hmaihtir thin si a. Chatuana fate hamthatna tur ngaihthah khawpin he khawvel thilah hian nu leh pa leh an chhungte hian kan ngaihtuahna leh kan rilru kan seng nasa hle mai! Chatuan hremna an pumpelh theihna tur hian nu leh pa leh puitlingte hian tihtur kan ngahin, kan kovah thil tam tak a innghat a ni.

Hna pawimawh i ngaihsak ang :  Nu leh pa leh puitling ten hna pawimawh zawk Lalpa kawng zawh tura zirtir tak tak si lova thil dang an ngaihpawimawhna zawk hian sualna a tipunlun nasa em em mai a. Engvangin nge tunlaiah sualna a tam tawh kan tih leh mai thin? Sualna tirem turin sual kan haw tawk tak tak tawh lo a, kan in tha en liam vel mai mai a. Miin sual a tih a, pawi a khawihin a tuartu kan nih loh chuan pawi tihna kan nei tawh lo a. 'Tu fa nge?' 'Tunge a chhungte?'  “A chhungte an va khawngaihthlak ve,” kan ti a, kan duhtawk ta der mai.

Kan naupan lai chuan thilsual kan tihin puitling, kan chhungte ni miah lo pawhin min hmuh chuan, en liam mai mai lovin, min kamkhat a, ti tawh lo turin min hrilh hram thin kha a ni a. A upat hun pawha a thlah loh tur, a kalna awm kawnga naupangte zirtir hi nu leh pa leh puitling te hian sualna pung zel tur danna a ni tih hriain, hna pawimawhah neiin i ngaihthah lo ang u.

Thununna : Thing chu kawih kul dan zelin a thang a, amaherawhchu, a puitlin hnu chuan theihtawp pawhin kuai mah ila awmzia a nei tawh lo. Kan kawih lai kan thlah rualin a ngai angin a awm leh nghal ang. Chutiang chiah chuan mihringte pawh hi naupan laia inthununna tha (Pathian duhzawng) hian nun awmze nei a hring chhuak thin. ‘Naupang thinlungah chuan atna a bet tlat a; mahse thununna tiangin hla takah a hnawt kiang ang’ (Thuf 22:15). ‘Tiang hmang duh lo chuan fa a hua a ni, a hmangaihna erawh chuan a thunun chawt thin’ (Thuf 13:24).

Thununnain finna kan zirtir ang a, kan hmangaihna lantir nan kan fate, kan naute chu kan thunun dawn a ni. Sunday School kal tluan chhuak fel lo hi a awm theih em? Zirlai zirtir bakah thununna nena School ropui tak hi inkaihhruai anih loh chuan Pathian thuawihna kan tlachham telh telh ang a, kan kristianna hi a hnungtawlh zawngin a kal dawn a ni. Zirtirtute pawhin naupangte an thlarau nun kan ngaih pawimawh hi a tul hle a ni. Khawtlanga misual ni a kan hriat kha Sunday School a kan zirtir thin nise la, zahthlak tihna chang kan hria ang em? Sunday School zirtirtute leh nu leh pa te, upa zawkte kovah hian naupangte hmalam hun tur hi a innghat thui hle a ni. “I fate thunun la tichuan Seol ata a nunna i chhanchhuak ang” tih a ni si a.

Tuh rah seng :  Galatia 6:7-ah “Miin a theh apiang, chumi vek chu a seng bawk dawn si a” tih kan hmu a. Kan rama sualna pung nasa kan tihte hi enge a chhan ni thei ang? Kan theh aia tha tumahin kan seng dawn si lova, chuvangin sualna punna chhan chu a thehtute hi an ni mai lo maw? Tuna naupangte hi nakina kan kohhran hruaitu, ram hruaitu la ni turte an ni. Nu leh pa leh puitlingte hi entawn tlakin awm ila, fel tak leh dik taka naupangte seilentir hi kan bat a ni.

Bank-ah nakina hman tur pawisa kan dahin kan thla a muang viau a ni thei, mahse chumi ai chuan kan fate, kan naute nuna Pathian thu kan dah luh hian hlimna nasa zawk, nakina kan tana hlimna leh lawmna nasa zawk, sum leh pai, lei hausakna te sawi hleih theih loh chu kan nei zawk dawn a ni.

Pathianin puithiam Elia chhungte a hrem chhan chu a faten Pathian an sawichhiatna sual chu hre reng pawha a khap loh vang a ni. Lalpa laka kan rochan fanaute hi chatuana nunna an neih theihna tura kaihhruai leh enkawl hi Lalpa hna a ni tih hre thar zelin, kan duh loh rah kan seng loh nan naupangte kawng dik kawhhmuh ila, Lalpa tana hna tha tak, keimahni tana malsawmna ni bawk si kan thawk a lo ni reng dawn a ni.

Lalpan malsawm rawh se. Amen

No comments:

Post a Comment