Thursday, April 28, 2011

THISEN HLU, THISEN HLU

Ni 30 April, 2011 (Inrinni) hian Bial KTP Silver Jubilee denchhenin kan Kohhran Hall-ah Blood Donation Camp kan nei dawn a nih kha. KTP Member a tam thei ang ber thisen pe turin kan insawm tak meuh meuh a ni e.

Aizawl pawn lam tan pawh online/wireless/correspondence-in a pek theih mai thei, hehehe.........

Monday, April 25, 2011

Sunrise Service hman a ni

Easter Sunday Sunrise Service :
Ni 24.04.2011 (Pathianni) zingkarah khan kan Biak In kawtah KTP kaihhruaiin Sunrise Service programme hman a ni. He hunah hian Kohhran Committee remtihnain Kohhran Zing Tawngtai Inkhawm chu telh nghal a ni a, KTP member te bakah Kohhran mipui engemaw zat an tel. Hun hman zawhah thingpui leh a hmeh bakah artui (Easter Egg) te sem a ni a, mi 250 chuangin he hun hi an hmang a ni.

FAITH PROMISE : APRIL, 2011



Sunday, April 24, 2011

Sermon (Thalai Aw, 25th April, 2011 issue)

Keima hnenah pawh a inlar ve!
“ Tin, a tawp berah chuan a hun lova piang ang, keima hnenah pawh a inlar a."

Upa Lalthianghlima

Vawiin kan Lal Isua Krista thawhlehna ni ropui takah hian, Thawhlehna hmahruaitu, tho leh Lalpa inlarna dawngtute atang hian, kan hnenah pawh tho leh Lal Isua hi a inlar ve em? tiin, heng thute hian keimahni theuh i inen ve teh ang u.
Ka Lalpa an kalbo pui ta : Isua thlan bula Mari Magdalini tah hla chu, “Ka Lalpa an kal bopui ta, an dahna chin ka hre si lova,” tiin Mari chu lungchhe em emin a tap rawih rawih mai a. Mari tah chhan en hian a runthlak hle a ni. Hmangaih berte awmna chin hriat loh chu thil buaithlak tak a ni ang. Kan duhtak leh ngaih ngawih nghawih te chin hriat lohva an awm chu a hrehzawm zia kan hre theuh ang. Mari ang hian kan tap ve ang.
Duhtak leh ngaih tak te nena inthen chu mi a ber pawhin hrehawm kan tiin tuar harsa kan ti thin. Mari hian a Lalpa awmna nia a hriat chian ber thlanah a awm si lova, khawharin a tap ngawih ngawih mai niin a lang. Isua ngaina a, hmuh tuma kal te hian Isua hmuh an tum dan a dik lo a ni. An Lalpa chu thihna phuar chungin hmuh an tum a, mahse an hmu lo.
Engatinge mitthi zingah minung in zawn? : Isua zuitute hian engatinge an Lalpa thusawi an hriat theih loh le? Puithiam lalte, sorkar hotuten Isua thawhleh tur thu te hriain thlante an ventir a, amah zuitu Zirtirten engatinge Isua ruang hmuh an tum talh le? Chutiang chuan Mari-te hian Isua ruang hnawih tur rimtuite kengin thlan lam an pan a ni.
Isua thlan an thleng chu thlan chu a lo ruak a, an buai hle mai. Mahse, Vantirhkoh-in Mari te a lo hmu a, “Engatinge mitthi zingah minung in zawn? Hetah a awm tawh lo, a tho leh tawh” a lo ti a. Hriak rimtui hmanga Lalpa hi cheimawi chi a ni lo. Lalpa hi kan thil neih hmanga tih rimtui mai chi a ni lova, mitthi zingah minung khung rei chu Lalpa'n rem a ti lo, thihna ata kaihthawh leh chu Pathian thil tum a ni si a.
Vawiin thleng hian mitthi zingah minung Krista hi zawng kan la awm em? Tho leh Lalpa hi khawvel thila tih rimtui theih a ni lo, rimtui sa a ni e.
Isua hmangaihtute hnenah a inlar : Isua hmangaiha ngainatu, a ruang dai pawh thlahlel hnenah 'Mari' tiin a hming ngeiin a kova, a Lalpa ngei a ni tih a inpuang. Vawiin thlengin Isua ngainatu, a tel lova khawsa thei lote hnenah a inpuangin a inhriattir thin a, nungin a inentir reng a ni. Mari pawhin 'Rabboni' tiin a zirtirtu chu a ko nghal a, beramte chuan Lalpa aw an hre thin a ni. Amah Lal Isuan min hmangaih avangin keini kan chian loh lai pawhin kan hmingin min ko thin a, “Ka ta in ni asin” min ti.
Zualko-ah an tang thin : Thlan kal ten thlan ruak tih leh a thawhleh thu hria a an hnen ngeiah pawh a inlar hnu chuan a thawhleh thu midang hrilh turin tho leh Lalpa'n zualko tura a tirh Mari-te chu an kal thuai thuai a, “Lalpa chu a tho leh ta” tiin an hrilh darh ta a ni.
    Hmanlai Kristian hmasate chuan chibai buk nan “Lalpa chu a tho leh ta” tiin thu hmasa berah an neih thin an ti. Vawiin thleng hian Isua inlarna dawngtu zawng zawngte chu thawhlehna thu, Isua a nung reng tih thu hi kan tlangauna hla a ni a. Hman hmawh taka Zualko tlan anga tirh kan ni e.
I hnenah Tho leh Lapa hi a inlar ve em? : Tirkhoh Paula chu Juda biak danah sakhaw mi, thahnemngai em emtu, kristian Isua zuitute haw em emtu, tiduhdahtu, phuar chunga Jerusalem panpui thintu a ni.
Chutianga Kristiante an man lai chuan Isua nen a intawk ta thut mai a. Isuan “Saula, Saula engatinge mi tihduhdah” tiin Paula hnenah Isua a inhriattir a, kaih ngai khawpin khaw hmu lovin a lo awm ta a, a lo piangthar ve ta a ni. “A hun lova piang ang keima hnenah a inlar” tiin piang tlai intiin he thu hi a lo sawi ta a ni.
Rochan chhe thei lo in tan vanah dah a tiam a ni” tiin lehlin thar chuan a ti. A va ropui em! Thildang beisei tur kan nei lo; lawmna tur dang zawn pawh a tul lo. Isua tho leh Lalpa hi kan hnenah a awm reng a, chu ro chu kan tan peih diamin, Lalpa'n min pe a ni. Tholeh Lalpa hi i hnenah a inlar ve em?

Lalpa’n malsawm rawh se.

Saturday, April 23, 2011

Kohhran Inkhawm Programme

April ni 24, Pathianni (Easter Sunday)
Chawhma
Hruaitu  :  Upa Lalzuithanga
Thuhriltu  :  Rev. R. C. Lalnghakliana
Thupui  :  ‘A tho leh ta, hetah a awm tawh lo
Zaipawl  :  Kohhran Zaipawl
Inkhawm banah lengkhawm hruaitu Pu C. Lalthlamuana a ni ang.

Chawhnu
Hruaitu  :  Pro. Pastor Lalhmangaiha
Thuhriltu  :  Upa F. Hrangmuana
Thupui  :  ‘Emmau dai reh
Items  :  Pathianni Naupang Inkhawm
Inkhawm banah lengkhawm hruaitu Pi Lalfeli a ni ang.

Zan
Hruaitu  :  Upa R. Zirrokunga
Thuhriltu  :  Upa R. Vanlalruata
Thupui  :  ‘Isua thawh angin kan tho ve ang
Zaipawl  :  Kohhran Zaipawl
Inkhawm banah lengkhawm hruaitu Pu K. Lalbiakliana a ni ang.

April ni 27, Nilai zan
Tantu  :  Pi Sangziki (10)
Thupui hawngtu  :  Pi Lalbuaii (8)
Thupui   :  ‘Hun hnuhnung thu - Paula sawi dan’

April ni 30, Inrinni Zan - (Thuhril inkhawm)
Tantu  :  Pi Vanlalchhungi
Thuhriltu  :  Pu H. Kaphlira
Ramthar pual a sermon a ni ang a, Ramthar puala bawm dawh a ni bawk ang.

KTP Inkhawm Programme

25th April, 2011 (Thawhtan) Zan Inkhawm
A hmun  :  Biak In
Hruaitu  :  Pu C. Lalhmingduhawma, Br. Commtt. Member
Tantu  :  Tv. P.C Vanlaldika, Marka Group
Mihlate puala tawngtai  :  Nl. Judy Lalbiakfeli, Johana Group
Thilpek hlantu  :  Tv. Lalzidinga, Matthaia Group
Thusawitu  :  Pu David Zohmangaiha, Asst. Leader

GROUP NEWS

Luka Group :
Bawlhhlawh khawlna Polythene lei tur an la nei a, Group hruaitute hnenah ngaihven theih a ni. Group huam chhunga member-te lehkhachhia khawl zel turin an inngen a, lehkhachhia hi ni 7.5.11 zing karah lakkhawm tum a ni. Ni 1.5.’11 (Sunday) tlaiah Group Committe member-ten Field Veng lama KTP member te tlawh tur a ni a, member-te an inhriattir lawk a ni.

Johana Group :
Ni 29.4.11 (Zirtawpni) tlai dar 5:30 hian Doordarshan Kendra, Durtlang-ah tunlai zirna kalphung thar, CCE chungchang sawihonaah hun an hmang dawn a. Live Telecast tur a ni a, member-ten lo thlir ngei turin an inngen a ni.

Monday, April 18, 2011

2011 REPUBLIC VENG BIAL INKHAWMPUI MINUTE

Ni 15-17 April, 2011 chhung khan kan Kohhran Biak Inah Bial Inkhawmpui vawi 26-na neih a ni a. Inkhawmpui Minute (lak tawi) hetiang hi a ni e -

A hmun  :  Republic Veng Kohhran Biak In
A hun  :  15 - 17 April, 2011
Thlarau lam thupui  :  “Sim hming pu tlaka rah”  (Luka 3:8)

PUIPATE
Chairman      :  Upa Lalthanghluana   &   Rev. R.C. Lalnghakliana (Retiring)
Secretaries    :  Upa R. Zirrokunga (Sr.)   &   Upa Lalrinmuana  (Jr.)
Treasurers    :  Upa K. Darthanga (Bial sum)   &   Upa Lalzuithanga (Synod sum)

NOMINATION

1. Kum 2011 Bial Inkhawmpui Programme ennawn :  Kum 2011 Bial Inkhawmpui Programme kan ennawn a, chanvo nei tura ruatte’n an tihlawhtling thei vek dawn niin kan hria a, Programme tih danglam ngai a awm lova, a lawmawm kan ti hle.

2. Mual Inkhawm neih chungchang :  Kumin Bial Inkhawmpuiah hian Mual Inkhawm kan nei ang em ? tih kan ngaihtuah a, Ni 17.04.2011 (Pathianni) Chawhnu Inkhawm banah Mual Inkhawm neih nise kan ti a. Programme hetiangin kan ruahman.
Hruaitu  :  Upa Lalthanghluana, Bial Chairman
Thusawitu  :  Pu C. Lalramthara, Upper Republic (Synod Revival Speaker)

3. Inkhawm bana inpawlhona neih thu :  Bial Inkhawmpui chhungin inkhawm kar lakah hla a  inpawlhona neih tha kan ti a, hetiangin kan ruahman.
     (1) Ni 16.4.2011 (Inrinni) zan inkhawm ban
          Hruaitu   : T.Upa R. Hrangtawna, Republic Vengthlang
     (2) Ni 17.4.2011 (Pathianni) Chawhma inkhawm ban
          Hruaitu   : Upa Lalpiangthara, Upper Republic
     (3) Ni 17.4.2011 (Pathianni) Zan inkhawm ban
          Hruaitu   : Upa P.C. Lalhmuaka, Republic Veng

4. Kum 2012 Bial Inkhawmpui Programme :
    1) Kum 2012 Bial Inkhawmpui Programme hetiangin kan ruahman :
        A hmun  :  Upper Republic Kohhran Biak In
        A hun   :  Ni 20 - 22 April, 2012
        Thupui  : “ Kraws Thu ” (I Korinth 1:18)
     Puipate
     Chairman  :  Upa H. Zoramthanga   &   Upa Lalthanghluana (Retiring)
     Secretaries  :  Upa Lalrinmuana (Sr.)   &   Upa C. Lalrinzuala (Jr.)
     Treasurers  :  Upa K. Darthanga, Bial Inkhawmpui Treasurer   &   Upa Lalzuithanga, Bial Treasurer

     2012 Bial Inkhawmpui Programme duan nghal a ni.

5. Auditors ruatna :  Kum 2011 - 2012-a Bial Sum chi hrang hrang endiktu (Auditors) turin heng, Upa H. Lalthankhuma, Republic Vengthlang leh Upa F. Lalliantluanga, Upper Republic te hi kan ruat.

6. Bial Sunday School Secretary ruatna :  Kum 2011-14 chhung atana  Bial  Sunday School Secretary atan heng mite hi kan ruat :
Secretary  :  Upa C. Lalchharliana, Republic Veng
Asst. Secretary  :  Upa F. Lalfakzuala, Republic Vengthlang

7. Bial Buhfaiham Ziaktu ruatna :  Kum 2011-2012 chhunga Bial Buhfai\ham ziaktu atan Pi K. Lalramthangi  Republic Veng leh Pi Lalengzami Upper Republic te hi kan ruat.

8. Kum 2011-a Synod leh Presbytery Inkhawmpui Palai ruat belh thu :  Kum 2011-a Synod Inkhawmpuiah kan bial chhunga dan zawhkim awm dan chhutin Palai pakhat kan ruat belh thei niin a hriat a. Pu R. Lalhmingthanga, Central K.T.P Committee Member (Republic Vengthlang) chu kan ruat. Presbytery Inkhawmpui Palai erawh chu kuminah chuan ruat belh theih kan ni lo a ni.

SUNDAY SCHOOL
Bial Sunday School Committee atanga rawtna

1.  “NPSS leh Senior Department zirlaibu a data / figure dik lo awm thin hi MSSU-in kum tin update emaw tihdikna emaw siam thin rawh se” tih chu Sunday School Secretary-in thil awmdante a sawifiah hnuin kan ngaihtuah zui a. Rawtna ang hian Bial Inkhawmpui-a chhawpchhuah chu a tha e, tiin he thu hi rawn chhawpchhuah a ni a. Kan sawiho hnuin hemi chungchang hi MSSU Committee-ah thlen ni se kan ti.

2 “Sunday School Zirtirtu Training - naupang leh puitling tan kumin chhung hian Kohhran tinah neih ni rawh se,” tih rawtna chu a tha e kan ti a. Hei hi Kohhran tinin anmahni remchan hunah neih mai tur a ni ang, tiin Inkhawmpui rorelnaah an rawn chhawp a. Hemi chungchang hi kan sawi zui a, Sunday School Committee rawtna hi a tha e kan ti

FINANCIAL

1. BIAL INKHAWMPUI SUM REPORT :  Chairman-in Treasurer (Bial Sum vawngtu), Upa K. Darthanga chu Bial sum dinhmun report pe turin a sawm a. Sum dinhmun khaikhawmna hetiang hi a ni.
A : Bial Inkhawmpui Sum 
  Kum 2009-2010 hman bang  - Rs. 54,926.00
  Kum 2010-2011 sum hmuh  - Rs. 2,40,376.00
  Sum hmuh zawng zawng - Rs. 2,95,302.00
  Sum hman zawng zawng - Rs. 2,16,901.00
  Hman Bang   - Rs. 78,401.00

B : Masihi Sangati Sum
  Kum 2009-2010 hman bang  - Rs. 13,024.00
  Kum 2010-2011-a sum hmuh  - Rs. 64,000.00
  Sum hmuh zawng zawng - Rs. 77,024.00
  Sum hman zawng zawng - Rs. 65,578.00
  Hman Bang   - Rs. 11,446.00

2. Synod sum report : Chairman-in Synod sum vawngtu, Upa Lalzuithanga chu report pe turin a sawm a. Kum 2010 April - March 2011 chhunga kan Bial in Synod-a Sum kan chhun luh dan report kan ngaithla a. A pumpui thuah kum hmasa kan thawhlawm Rs. 117,08,680/- chu Rs. 29,59,722/- laiin kan khum thei a. Tin, Dan zawhkim pakhat thawh chhuah zat pawh Rs. 3,227/- niin  kum hmasa aiin Rs. 971/- laiin kan pung bawk a, Pathian Ram thilpek-ah hma kan sawn hle a ni tih report atangin kan hmu thei a, a lawmawm kan ti hle.

3. Auditors  Report :  Kum 2010 Bial Inkhawmpui Sum Endiktu (Auditors)-a ruat, Upa C. Lalbiakchhunga leh Upa H. Lalthankhuma te hnen atangin Audit report kan dawn chu Bial Secretary-in a chhiar chhuak a. Bial Sum te hi him tak leh fel taka vawn a ni tih kan dawng a, lawmawm kan ti hle.

4. BIAL BUDGET RUAHMANNA :  Bial Inkhawmpui Treasurer, Upa K. Darthanga’n Kum 2011-2012 Bial Budget ruahmanna chu pharhin a sawifiah a. Zawh ngaite zawtin kan inhrilhfiah a, Budget ruahman chu lawm takin kan pawm.

5. FINANCE COMMITTEE  ATANGA THULUT :
Finance Campaign neih rawtna :  Finance Committee atangin kum 2011-12 chhung hian Bial chhung Kohhran tinah Finance Campaign neih rawtna a lo lut a. Rawtna chu kan sawi hova, Finance committee rawtna chu a tha e kan ti a. Finance Committee-in hma lain lo bawhzui rawh se kan ti.

GENERAL

1.  Republic Veng Kohhran atanga thu lut, “Synod hian a \ul dan azirin Pastor Bial khatah Pastor pakhat aia tam dah theih dan Policy siam rawh se ” tih chu an thehluh chhan sawifiah tir a ni a. An sawifiah hnuah kan ngaihdan zau takin kan sawi hova. Rawtna lo lut angin Presbytery-ah kal zel rawh se kan ti.

2.  Republic Vengthlang Kohhran atanga thu lut, “Pem Upa thlan nawn an niha puan dan tawngkam hi inang tlanga hman dan tur ruahman ni rawh se” tih chu an thehluh chhan sawifiah tir a nih hnuah kan sawiho a. Rawtna lo lut ang hian Presbytery-ah kal zel rawh se kan ti.

3.  Republic Veng Kohhran atangin “Bial Secretary Term hi kum 2 ni tawh lovin kum 1 ni tawh rawh se” tih thu a lo lut a. Chairman-in an thehluh chhan a sawitir hnuah ngun takin kan sawi hova. Rawtna angin “Bial Secretary Term hi kum 2 ni tawh lovin kum 1 ni tawh rawh se” tih chu a tha e kan ti a. Tun atanga hman nghal tur a ni ang kan ti.

4.  Republic Vengthlang Kohhran atangin “Synod Thurel lakkhawm 1971 leh a hnu lam hi a Bu a siam ni ve rawh se” tih an rawtna chu Chairman-in an thehluh chhan sawifiah turin a thehluttu Kohhran a sawm a, an sawifiah a. Hemi chungchang hi SEC hmalak mekna a nih thu kan inhrilhfiah a. Kan inhrilhfiahna hi a tawk e kan ti.

5.  Republic Veng Kohhran atanga thu lut, “Kohhran Inkhawmpui rorel zawmna kawngah Kohhran mipuite inzirtir thar ni sela. Hemi atan hian Synod-in hma la rawh se”  tih chu Chairman-in an thehluh chhan sawi turin a sawm a, an sawifiah hnuah kan ngaihdan kan sawi zui nghal a. Rawtna ang hian Prebytery-ah kal zel rawh se kan ti.

6.  Republic Vengthlang Kohhran atanga thu lut, “Synod Secretary kan inruat thinah hian Minister / Pastor-te bakah chuan Kohhran Upa, Synod hnuaia thawk mekte chauh ni lovin pawn lam mite pawh ruat ve thin ni rawh se”  tih chu an thehluh chhan sawifiah turin Chairman-in a sawm a, an sawifiah hnuin kan sawi hova. Kum 2009 Synod General No. 22-in a lo rel tawh dan te pawh sawi chhuakin kan inhrilhfiah a, kan sawi hona hi a tawk e kan ti.

7.  Kohhran Committee Member (Tual Upa) Thlan dilna :  Republic Veng Kohhran atangin Kohhran Committee (Tual Upa) thlan dilna kan dawng a. An dil chhan diltu Kohhran atangin kan ngaithla bawk a. An dil angin Tual Upa 3 thlan chu phal sak an ni. Thlan pui turte kan ruat nghal bawk.

INTHLANNA

Kum 2011-2012 chhunga Bial Committee hrang hrang Member turte hetiangin kan thlang.
BIAL STANDING  COMMITTEE (2011 - 2012 )
 1.  Upa H.Zoramthanga   Republic Veng
 2.  Upa R.Zirrokunga   Republic Veng
 3.  Upa C.Lalchharliana   Republic Veng
 4. Upa C.Lalbiakchhunga  Republic Veng
 5.  Upa R.Vanlalruata   Republic Veng
 6.  Upa Zaneihtluanga   Upper Republic
 7.  Upa Zoramkunga Pachuau  Upper Republic
 8.  Upa F.Lalliantluanga   Upper Republic
 9.  Upa Lungngailova Colney  Upper Republic
 10. Upa C.Lalmuanthanga  Upper Republic
 11.  Upa J.Lalhlima   Republic Vengthlang
 12.  Upa Dr. P. Lalremliana  Republic Vengthlang
 13.  Upa H.Lalthankhuma  Republic Vengthlang
 14.  Upa R.Lalropuia   Republic Vengthlang
 15.  T.Upa R.Hrangtawna  Republic Vengthlang

BIAL NOMINATION COMMITTEE MEMBER (2012) 
  1. Upa F.Hrangmuana   Republic Veng
  2.  Upa P.C.Lalhmuaka   Republic Veng
  3.  Upa Lungngailova Colney  Upper Republic
  4.  Upa C.Lalmuanthanga  Upper Republic
  5.  Upa R.Kapliana   Republic Vengthlang

BIAL SUNDAY SCHOOL COMMITTEE MEMBER (2011 - 2012) 
  1.  Upa Lalthianghlima   Republic Veng
  2.  Upa C.Lalbiakchhunga  Republic Veng
  3.  Upa C.Lalmuanthanga  Upper Republic
  4.  Upa Lalpiangthara   Upper Republic
  5.  Upa Dr. P.Lalremliana  Republic Vengthlang
  6.  Upa Siliana    Republic Vengthlang

BIAL  FINANCE COMMITTEE MEMBER (2011 - 2012) 
  1.  Upa Lalthakhuma   Republic Veng
  2.  Upa Zoramkunga Pachuau  Upper Republic
  3. Upa R. Kapliana   Republic Vengthlang
  4.  Bial chhung Kohhran tin Treasurer te

BIAL MASIHI SANGATI COMMITTEE MEMBER  (2011 - 2012)
  1.  Upa P.C.Lalhmuaka   Republic Veng
  2.  Pu B.Sanga Sailo   Republic Veng
  3.  Pu S.Hrangluaia   Republic Veng
  4.  Pu David Zothankhuma  Republic Veng
  5.  Upa Lalpiangthara   Upper Republic
  6.  Pu K.Lalchhunga   Upper Republic
  7.  Pu Lalnghaka   Upper Republic
  8.  Tv. H.Lalhmingmawia  Upper Republic
  9.  Upa Siliana    Republic Vengthlang
  10. Upa K.Kapzova   Republic Vengthlang
  11. Pu P.C.Lalhnuna   Republic Vengthlang
  12. Pu K.Thanghnuna   Republic Vengthlang

PRESBYTERY INKHAWMPUI (2011) PALAI RUATNA
Kohhran tin atanga Bial aiawha Presbytery Inkhawmpui (2011)-a Palai turte kan ruat.

KUM 2011 SYNOD INKHAWMPUI PALAI :
Palai nisa mi 10 leh palai thlan mi 11 te ruat an ni.

Prebytery leh Synod Inkhawmpui Palai tura ruatte chhiarchhuakin lawm takin kan pawm.

REPORTS
1. Bial Sunday School Report :  Bial Sunday School Secretary, Upa Lungngailova Colney hnen atangin Bial Sunday School Report kan ngaithla a, lawm takin kan pawm.
2. Bial KTP Report :  Bial KTP Secretary, Pu Lalnilena hnen atangin Republic Veng Bial K.T.P rawngbawlna report kan ngaithla a, lawm takin kan pawm.
3. Bial Kohhran Hmeichhe Report :  Bial Kohhran Hmeichhe Secretary, Pi Lalfeli’n Bial Kohhran Hmeichhe rawngbawlna report pein kan ngaithla a, zawh ngaite zawtin kan inhrilhfiah hnuah report hi lawm takin kan pawm.
4. Bial Buhfaitham Report :  Bial Buhfaitham ziaktu Pi Lalremruati’n kum khat (Jan - Dec, 2010) chhunga Bial Buhfaitham dinhmun report a pek chu kan ngaithla a, zawhfiah ngaite zawtin kan inhrilhfiah a, siam rem ngaite siam remin report hi lawm takin kan pawm.

Sunday, April 17, 2011

KTP Inkhawm Programme

18th April, 2011 (Thawhtan) Zan Inkhawm
A hmun  :  Biak In
Hruaitu  :  Tv. Ramnuntluanga, Asst. Secretary
Tantu  :  Nl. C. Lalthlamuani, Matthaia Group
Mi hlate puala tawngtai  :  Nl. Jolie Lalruatsangi, Luka Group
Thilpek & Faith Promise  :  Tv. Zonunsanga Pachuau, Johana Gr.
Thusawitu  :  Nl. P.C Lalmuanpuii, Branch Commtt. Member

Thisen i pe ve dawn lawmni?

     Ni 30.4.2011 (Inrinni) hian Republic Veng Bial KTP Silver Jubilee denchhenin bial huapin kan Kohhran Hall-ah Thisen pek runpui kan nei dawn a nih kha! Heta tan hian i thisen hlu tak kha a far ve dawn em?
     Thisen pek hi a hlauhawm em? Puitling hrisel pangngaiin thisen kan neih zawng zawng litres 4-5 atanga 300 ml lek han pek hi chhiatpui tham a tling lo. Kan thisen hi darkar 24 chhung leka pangngai leh tura ngaih a ni. Ei tih that teh chiam pawh a ngai lo. Thisen hi pe lo mah ila, engtik lai pawha insiam a kehchhe reng a ni, chuvang chuan pe lo mah ila a riral tho tho dawn.
     Tute nge thisen pe thei? Mi hrisel pangngai, kum 18 - 60 inkar, kg 45 chung lam, a hmei a pa ten thla 3 danah thisen hi an pe thei.
     Hmel hriat lem loh tana thisen pek hi? Mahni chhung leh thiante tan pawh ni lo, hmelhriat lohte tan daiha kan thisen hlu tak han pek chu uihawm tak a ni. Mahse, a hluin a tangkai riau asin. Mi tam tak thisen pek saktu tur nei ve lo, a bikin thingtlang lam mite tan malsawmna a ni.
     Rikrum thil (Emergency)-ah thisen test lawk sa diam, pek mai theih tur lo awm hi a tangkai em em a. Thisen hman mai tur awm loh laiin, tawhsual tawk thisen mamawh ngawih ngawih awm ta thut se a buaithlak viau ang. Kan han inpunkhawm a nga, thisen laa kan test leh te te chhungin kan dam lo chuan van kohna a lo chhang hman ang tihte pawh a hlauhawm tak zet a ni.
    Kan thisen hlu takte midang tana pe turin member zawng zawng te i lo inring lawk ang u.

Venpui Zan & Good Friday Kohhran Programme

April ni 21, Ninga Zan - Venpui Zan
(Lalpa Zanriah Sacrament)
Buatsaihtu : Rev. V. Lawmkima
Zaipawl : Kohhran Zaipawl
Inkhawm banah lengkhawm a awm ang a, lengkhawm hruaitu Pu Isaak Lalremsiama a ni ang.

April ni 22, Zirtawpni - Good Friday
Chawhma
Hruaitu  :  Upa Lalthianghlima
Thuhriltu  :  Upa H. Thangzuala
Thupui  :  ‘Kam khat mahin a chhang lo’
Zaipawl  :  Kohhran Zaipawl
Inkhawm banah lengkhawm a awm ang a, lengkhawm hruaitu Pu Lalengliana a ni ang.

Chawhnu
Hruaitu  :  Upa P.C Lalhmuaka
Thuhriltu  :  Upa C. Lalbiakchhunga
Thupui  :  ‘Mahni intidam thei lo’
Item  :  Christian Youth Service
Inkhawm banah lengkhawm a awm ang a, lengkhawm hruaitu Pu C. Lalenga a ni ang.

Zan
Hruaitu  :  Upa L. Biakchhunga
Thuhriltu  :  Upa Lalthakhuma
Thupui  :  ‘Kalvari ennawm chu’
Zaipawl  :  Kohhran Zaipawl
Inkhawm banah lengkhawm a awm ang a, lengkhawm hruaitu Pu R.C Thuama a ni ang.

Sermon (Thalai Aw, 17th April, 2011)

LALPA'IN A DUH A NI
“Tin, tupawhin, ‘Kha kha engah nge in tih?’ an tih che u chuan, ‘Lalpa'in a duh a ni; hetah a rawn dah tir leh thuai ang e’ ti ang che u’ a ti a." (Marka 11:1-11)
Upa R. Vanlalruata

    Tumkau ni hi Kum 1999 Synod inkhawmpui chuan Kohhran ni pawimawha hman turin a rel a. He thurel bawhzui hian Synod Executive Committee (SEC) chuan, “Sunday School tibuai lovin Inkhawm Programme siam ni rawh se,” tiin a rel a. Kuminah hian chawhnu inkhawmah leh zan inkhawma hman turin, thupui pahnih siam a ni a. Kan Kohhranin Pastor Bial Inkhawmpui kan thlen avangin thupui pakhat zawk ’Lalpan a duh a ni’ tih hi Kohhran hoten kan lo ngaihtuah ho atan ka rawn chhawpchhuak a ni.
1. Lalpa duh hi kan pe phal em?
    Kan khawtlangah, kan inchhung khurah, mimal nun theuhah Lalpan duh leh mamawh tam tak a nei ngei ang. Chungte chu kan lo pe phal thin em aw? Kan lo phal a nih pawhin ui chin kan nei em le?
    Kan nawmsak nan leh keimahni mamawh atana kan hmanral tamzia ngaihtuah hian, Lalpa duh leh mamawh lam hi kan ngaihthah viau si em? tihte hi kan inzawh a tulin ka hria.
    Suahsual rawngbawl nan, ruihlo lei nan leh zuk leh hmuam lei nana kan sum khawhral zozaite hi a va tam em! Henga kan sum senralte hi Lalpa ram zau nan te, a rawngbawlna kawng hrang hranga hman turin Lalpa'n a duh a ni tih hriain a hnenah kan pe phal zawk tur a ni dawn lawm ni?
    Kan taksa leh nunnna ngei pawh hi Lalpa'n a hman atan a duh a, phal takin kan pe mai tur a ni dawn lawm ni? Khawvel tan, phal taka kan inhlan huai ngam ang hian Lalpa tan huai takin i inhlan ve ang u. Lalpa'n a duh si a.
2. Lal Isua chuanna tur phuar behin a awm :
    Bible kan en chuan Lal Isua chuanna tur Sabengtung no kha phuar behin a awm a ni. Keini pawh Lal Isua chuanna tur ber hi phuar behin kan la awm reng em le? Halleluiah! Amen! ti thei lova siamtu che leh Biak In pawh thleng thei lova siamtu che hi eng nge ni aw? He Tumkau Ni lo thlengah hian phelha I awm a va tul ve le.
3. Lal Isua chawimawi turin sual phuarna phelh a ngai :
    Kan Bible chang thlan hi kan en chuan Lal Isua chawimawina hmanruaa a tan theih nan Sabengtung phuarna chu phelh a nih thu kan hmu a. He Sabengtung ang chiah hian keini pawh hi Lal Isua chawimawi tak tak tur chuan sual min phuarna zawng zawngte hi kan phelh hmasak a ngai a ni. Lal Isua chawimawi thei lo turin mi tamtak sual hrengah kan tang mek a. Heng mite hian, “Isua chu Lal a ni,” tia hlim taka kan chawimawi ve hi Lal Isuan min duh a ni.
4. Phelh turin mi a tir :
    Lal Isua chuanna tur ber kha phuar beh tlat a nih avangin, a phelh turin a zirtirte a tir a nih kha. Lal Isuan a hmanruaa ahman theihna turin sual phuara awm mekte hi phelh tura tirh kan ni. Chu rawngbawl hna thawk thei tura thahnemngaihna thinlung chu he tumkau ni lo thleng hian min pe thar theuh se a va duhawm ve le!
5. Lalpa thu tuman an hnial thei lo :
    ‘Phelh’ thu petu hi Lei leh Van Lalber anih avangin tuman an hnial thei lo. Sabengtung ang maia mi tlawm te, tuman eng atan maha an ngaih loh ‘ Ruihhlo ngai’ an tihte thleng hian Lalpa'n a ropuina puanchhuah nan, ‘Hosana’ tia amah chawimawitu atan Lalpa'n a duh tawh a, ‘ Phelh’ thupek kengtute hian hawh u, “ Lalpa'n a duh a ni,” tih hriain i phelh hmiah mai teh ang u.
Lalpan malsawm rawh se.

Kan Kohhran School titha

Synod Education Board chuan tehna hrang hrang hmangin Presbyterian hnuaia school hrang hrangte kum tin a endik thin a. Kuminah pawh hian Presbyterian School 80 chuang endikin, hetah hian kan Kohhran school (Republic Presbyterian School) chu school tha ber dawttu (2-na) ah thlan a ni. Khawpui chhungah phei chuan Pakhatna an ni a, KTP chuan kan lawmpuiin kan chhuang hle.

Tuesday, April 12, 2011

Bial KTP Sport







Bial KTP Sport







Bial KTP Sport Hlimthla 1











Bial KTP Sport Result

     9th April, 2011 (Inrinni) khan Republic Veng Bial KTP chuan Pachhunga Univ. College Playground ah Bial KTP Sport hlimawm kan nei a, Result chu hetiang hi a ni e -

1. Football - Mipa Pakhatna : Upper Republic Branch
 Pahnihna : Republic Veng Branch
 Pathumna : Republic Vengthlang Branch

2. Volleyball - Hmeichhia Pakhatna : Republic Veng Branch
 Pahnihna : Republic Vengthlang Branch
 Pathumna : Upper Republic Branch

3. Poison Ball - Mixed Pakhatna : Republic Vengthlang Branch
 Pahnihna : Upper Republic Branch
 Pathumna : Republic Veng Branch

4. 100 M Race - Mipa Pakhatna : Tv. Lalremtluanga, Republic Vengthlang Branch
 Pahnihna : Tv. Lalbiaksanga, Republic Vengthlang Branch
 Pathumna : Tv. R.K Luimawia, Republic Veng Branch
5. 100 M Race - Hmeichhia
 Pakhatna : Nl. Vanlalfeli, Republic Veng Branch
 Pahnihna : Nl. Lalnunhlimi, Republic Veng Branch
 Pathumna : Nl. Lalduhawmi, Upper Republic Branch

6. 200 M Race - Mipa Pakhatna : Tv. Laltlanthanga, Republic Veng Branch
 Pahnihna : Pu P.C Zosangliana, Republic Vengthlang Branch
 Pathumna : Tv. Vanlalchhuanga, Republic Vengthlang Branch

7. Sack Race - Hmeichhia
 Pakhatna : Nl. Angela Vanlalpeki, Republic Vengthlang Branch
 Pahnihna : Nl. R. Hmingthanzami, Republic Vengthlang Branch
 Pathumna : Nl. Lalrinhlui Tochhawng, Republic Veng Branch

8. Kawikah - Hmeichhia
 Pakhatna : Republic Vengthlang Branch
 Pahnihna : Upper Republic Branch
 Pathumna : Republic Veng Branch

9. Ketaminu Race - Mipa Pakhatna : Upper Republic Branch
 Pahnihna : Republic Vengthlang Branch
 Pathumna : Republic Veng Branch (a tawp tlan thleng lo an awm avangin point pek an ni lo)

10. Mass Relay Race - Mixed
 Pakhatna : Republic Vengthlang Branch
 Pahnihna : Upper Republic Branch
 Pathumna : Republic Veng Branch

11. Inchhiarna
 Pakhatna : Republic Vengthlang Branch (16.81%)
 Pahnihna : Upper Republic Branch (14.33%)
 Pathumna : Republic Veng Branch (13.81%)

     Inelna tinah hian 1-na : 100 points,  2-na : 70 points,  3-na : 50 points pek zel a ni a. A pumpui result chu hetiang hi a ni - 

Pakhatna   :  Republic Vengthlang Branch  (1050 points)
Pahnihna   :  Republic Veng Branch  (740 points)
Pathumna  :  Upper Republic Branch  (580 points)

Thursday, April 7, 2011

Ngenna

Blog hi a tunlai chu a enkawltute an hmaloh tlan avangin duh angin kan update tha hman lova, min tlawhtute ngaihhnathiamna kan ngen e. Hun rei lo te hnuah kan update thin turah i ngai phawt mai ang

Friday, April 1, 2011

Feh Chhuah Report

Branch KTP Feh chhuah Report

3rd Central Christian Naharup Annual Conference 2011
A hun : 18th - 20th March, 2011
A hmun : Lala, Hailakandi District, Assam
Thupui : Nakhoidi Taibangpanbagi Mangalni (Khawvel eng in ni e) Matthaia 5:14

Speaker : Rev. Lalmuankima Pautu i/c Lala Pastorate

Assam state-a Barak Area hmuna Meitei hnamte te zinga rawngbawlnaa Pastor bial (Pastorate) 4 (pali) te inzawmkhawm, Joint Pastoral Meeting (JPM)-in kum 2008-a a din Barak Area-a Kristian \halaite inzawmkhawm pawl - Central Christian Naharup (CCNR) chuan kum 2009 a\ang khan kumtin inkhawmpui (annual conference) an hmang \hin a.

Kumina CCNR Conference vawi 3-na hmanpui tur hian nikum 2010 khan Republic Veng Branch KTP chu min rawn sawm a, min sawmna hi Branch Committee chuan a thuphunga remti phawtin, kum thar lama la rel chian leh nise kan ti a. He feh chhuah tur hi kumin Branch Project atan kan nei a ni. February 24, 2011 zana Branch Committee chuan a kaldan tur leh thildangte a rel a, hemi baka tuldangte chu OB te lo bawhzui turin a dah a ni.

3rd Central Christian Naharup Annual Conference 2011 hi 18th - 20th March, 2011 chhung khan Lala Church, Hailakandi District, Assam-ah neih a ni a. Republic Veng Branch atanga he conference hmanpui tura kalte chu heng mite hi an ni –

1. Pu David Zohmangaiha, Asst. Leader
2. Tv. Lalhmingliana, Secretary
3. Tv. Ramnuntluanga, Asst. Secretary
4. Tv. Zoramliana Hnamte, Branch C/M
5. Tv. H. Lalthansanga, Branch C/M
6. Tv. Lalrimawia, Matthaia Gr.
7. Pu Vanlalhriata, Matthaia Gr.
8. Tv. P.C Vanlaldika, Marka Gr.
9. Tv. Lalrinmawia, Marka Gr.
10. Pu S. Lawmkima, Marka Gr.
11. Tv. Lalsangliana, Luka Gr.
12. Tv. Ramdinliana Renthlei, Johana Gr.
13. Nl. C. Lalthlamuani, Matthaia Gr.
14. Nl. Lalmalsawmi, Matthaia Gr.
15. Nl. Lalrinpuii Khiangte, Marka Gr.
16. Nl. Lalruatpuii, Marka Gr.
17. Nl. Ruby Hmingthansangi, Marka Gr.
18. Nl. Lalrinchhani Ralte, Marka Gr.
19. Nl. Laltlanchhungi, Marka Gr.
20. Nl. Lily Lalremruati, Marka Gr.
21. Nl. Lynda Zoremkimi, Marka Gr.
22. Nl. Lalduhawmi, Marka Gr.
23. Nl. Lalnunthari, Marka Gr.

Ni 17.03.11 (Ningani) zingkarah kan Kohhran Biak In kawtah kan bungruate Bus-a kan inhlan fel hnuin feh chhuak turte hi Upa H. Zoramthanga (Ex-officio member, Br.KTP) chuan tawngtaina hun hmangin min thlah a, zing dar 7:00-ah kan bungrua bakah sound system leh Silcoori Biak In thutthleng turte kengin Lala lam panin kan kal chhuak a ni. Zing dar 10:00 velah Bualpui-ah tukthuan kan ei a, chawhnu herah Assam state kan lut a, tlai dar 3:40 khan kan inkhawmpui neihna tur Lala Mission Compound kan thleng a ni.

Lala-ah hian bialtu pastor Rev. Lalmuankima Pautu te chhungkua leh thawktu dang ten min lo dawngsawng a, kan bungrua te inhlangthlain thingpuite kan in hnuah kan riahna tura min lo ruahman sak lam kan pan a. Mission compound chhungah hian Biak In awm nghalin Biak In kawtah hian pandal zar a ni a. Pandal zar chhungah hian puanin (tent) kaih a ni a, hengah te leh Biak In sira puanin kaihah te mipa ho zawng kan thleng a, kan hmeichhia te chu thawktu quarter pahnihah an thleng a ni. Heng Biak In, pandal, thawktu quarter, pastor quarter te hi pen hnih-thum vel leka inhnaih vek an ni. Hemi nî kan thlen tlai hian ruamhmanna min lo siamsak angin Lala bazar-a chaweina hotel pakhatah zanriah kan ei a ni.

Zan dar 7:00 ah pandal zar chhungah Rev. Lalmuankima kaihhruaiin inhmelhriattirna te leh Pathian hnena inhlanna kan nei a, he hunah hian Branch KTP chuan CCNR Conference tanpuina atan pawisa Rs. 5,000/- chu Rev. Lalmuankima kutah kan hlan a ni.

Ni 18.03.11 (Zirtawpni) zingah hian conference kan la tan loh avangin he hun hi remchanga hmangin Republic Veng Kohhran-in ramthar rawngbawlnaa kan hmalak mêkna Silcoori kan tlawh a (Silcoori Biak Ina hman tur thutthleng (bench) 12 kan Kohhran Ramthar Committee ten an duansa chu kan keng tel a ni). Silcoori leh Lala inkar hi 30 km vel (lirtheia darkar 1½ vel tlan) a ni a, Silcoori-ah hian kan Kohhranin thawktu kan rawih mek Pu Lalrinpuia te chhungkua leh ringtu pakhatin min lo dawngsawng a, a chenna inah hian tukthuan kan ei a (kan eina senso hi KTP sum atanga rulh leh vek a ni). Hemi hnu hian Silcoori Biak In kan tlawh a, Biak Inah hian programme tawi hmangin, tawngtairualna te kan hmang a, tin, rawngbawlna thila hman turin Pu Lalrinpuia hnenah Rs. 2,000/- Branch KTP chuan kan hlan bawk a ni. Biak Ina kan hun hman zawh hnu hian Silcoori-a ringthar hmasa leh Biak In tur hmun ram petu ni bawk, Pu Ragunath chenna in, Biak In chhak lawka awm chu kan tlawh a. Pu Ragunath hi a damloh avangin pawn chhuak thei lovin a awm a, a damlo kan nan member thenkhat ten pawisa thawhkhawmin an hlan nghal nghe nghe a ni.

Chawhnu lamah Lala panin kan kir leh a. Lala-ah hian hmun hrang hrang atanga CCNR Conference hmang tur thalaite pawh an lo thleng tawh a. Mission Compound sira hmun zawl laiah Conference tan nan chawhnu dar 2:30 ah Sport neih a ni a. A tira ruahmannaah tel chiah lo mah ila he Sport-ah hian tel ve tura min sawm avangin kan tel ve a, kan dinhmun chu hetiang hi a ni -
a) Tug of War (mipa) - 1st position
b) Tug of War (hmeichhia) - 1st position
c) Hriau thil (hmeichhia) - 2nd position
d) Hriau thil (mipa) - Nil
e) Musical Chair (mipa) - 3rd position
f) Musical Chair (hmeichhia) - 4th position
g) Mit tuama khuang vuak (hmeichhia) - Nil
h) Bible Race - Meitei tawnga zawhna siam a nih avangin kan tel lo.

Zirtawp zanah Pathian biak inkhawm Biak Inah neih a ni a, bial (Pastorate) pali ten report an pe a, kan member Tv. Lalrinmawia, Marka Gr. a zai (solo) a, kan Branch atanga kalte inhmelhriattirna kan nei bawk.

Ni 19.03.11 (Inrinni) zing dar 7:00 ah Biak Ina tawngtairualna te neih a nih hnuah Bible Tract (Meitei tawnga ziak) semna neih a ni a, Conference hmang tura rawn kal thalai zawng zawngte group thuma inthenin Lala khaw chhunga Meitei awmna bawr velah Bible Tract sem hian kan kal chhuak a ni. Dar 11:00 a.m ah chaw kan ei a, chawhnu dar 1:00 ah Biak Inah Conference Rorel Inkhawm neih a ni a, he Rorel Inkhawmah hi chuan kan tel ve lo a ni. Inrinni zan inkhawmah sermon (thupui) Speaker hnen atangin ngaihthlak tan a ni a, he inkhawmah hian hun min pek angin kan Kohhran leh Branch dinhmun tlangpui report te Branch Secretary-in a pe, Conference chibai bukna leh duhsakna te a hlan bawk a, a thusawite Meitei tawnga leh sak a ni.

Inrinni Zan inkhawm banah Fellowship hun hman a ni a, hruaituin a sawm angin kan Branch atangin Male Voice (Tv. Zoramliana Hnamte, Tv. H. Lalthansanga, Tv. Lalrimawia, Tv. Lalrinmawia) kan nei a, Meitei tawngin hla an sa nghe nghe a ni. Tin, kan Branch Asst. Secretary chuan kan Branch din chhoh dan leh kan sound system chungchang tlangpui report leh fuihna thutawi te a sawi bawk a, a thusawite Meitei tawnga leh sak a ni.

Ni 20.03.11 (Pathianni) zing dar 6:00 ah tawngtairual inkhawm tawi neih a niin, zing dar 8:00 ah thuhril inkhawm neih leh a ni. Chawhnu dar 12:30 atangin Pandal-ah Variety programme hman a ni a, he hunah hian Pastorate pali ten zai leh Bible Quiz-ah te inelna an nei a, lawmman te sem nghal a ni bawk. Tin, hruaituin a sawm angin Nl. Lalmalsawmi, Matthaia Gr. chu a zai (solo) bawk a ni.

Pathianni zan dar 7:00 ah Pathian biak inkhawm neih a ni a, mi kan len tam zawk avangin inkhawm hi Pandal-ah kan nei a ni. He inkhawmah hian Speaker hnen atangin sermon (thupui) ngaihthlak leh a ni a, hruaituin a sawm angin kan Branch Asst. Leader Pu David Zohmangaiha chuan kan thilpek lakkhawm te Pathian hnenah a hlan bawk. Tin, kan Branch atanga kal zawng zawng ten Branch KTP Zaipawl kan nei a, KTP Gen. Conf. Hlabu No. 23-na kan rem a ni. Inkhawm banah hian Fellowship programme hun hlimawm tak hman a ni bawk.

Conference hmang tura hmun hrang hrang atanga thalai rawn kalkhawm te hi kan zavaiin mi 100 vel kan ni.

Ni 21.03.11 (Thawhtanni) zingkarah haw turin kan insiam a, Lala bialtu Pastor Rev. Lalmuankima’n tawngtaina hmanga min thlahin zing dar 7:00 ah Mizoram lam panin kan chhuak a, chawhma dar 11:00 ah Kolasib thlengin tukthuan kan ei a, tlai dar 4:00 ah tluang takin kan Biak In kawt kan thleng a ni.


Central Christian Naharup dinhmun tlangpui

Assam Barak Area-a Meitei project bikah hian Pastorate (Bial) pali ( Pailapool Pastorate, Lala Pastorate, Kabuganj Pastorate, Jiribam Pastorate) an awm a. Hengte hi Joint Pastoral Meeting (JPM) hming vuahin an inhlawmkhawm a. JPM huam chhungah hian Pastor 4 an awm mek a, Mission Station 31 awmin missionary 22 an awm mek ni. An inchhinchhiah danin JPM huam chhungah hian ringtu 1200 vel an awma hriat a ni.

Thalai (Naharup) lam bika an inhlawm khawmna, Central Christian Naharup hi kum 2008-ah JPM hian a din a, kum 2009 atanga Conference hmang tanin kumin hi Conference vawi 3-na a ni. Din tan a nih lai hian member 50 vel an awm a, an rawngbawlnain hma sawn zelin tuna an dinhmun chu hetiang hi a ni –

1. Pailapool Pastorate Branch awm zat - 3 Member zat - 28
2. Kabuganj Pastorate Branch awm zat - 3 Member zat - 82
3. Lala Pastorate Branch awm zat - Nil / 1 Member zat - 24
4. Jiribam Pastorate Branch awm zat - 3 Member zat - 25
Total Branch awm zat - 9 Member zat - 159

Kumin Conference Rorel Inkhawma 2011Budget an passed zat hi Rs. 23,250/- a ni a, nakum CCNR Conference chu Jiribam-a hmang turin rorel inkhawm chuan a passed a ni. Tun tum Conference inbuatsaihna leh hmanna atana an sum sen zawng zawng chu Rs. 15,658/- a ni a, sum hman bang Rs. 1,342/- a ni

Lawmthu sawina :
1. Kan feh chhuah tluang taka min tihhlawhtlinsaktu Pathian hnenah lawmthu kan sawi.
2. Kohhran mipui ten min lo tawngtaipuina zawng zawngah lawmthu kan sawi.
3. Kohhran Committee-in feh chhuah min phalsak leh min ngaihven zuinaah te lawmthu kan sawi.
4. Rawngbawlna thila feh chhuahna tur remchang min siamsaktu CCNR hruaitute chungah lawmthu kan sawi.
5. Lala-a min lo mikhualtu Rev. Lalmuankima Pautu leh a thawhpuite zawng zawng chungah lawmthu kan sawi.
6. Kan member chawpchilh taka item nei tura ruat te chungah lawmthu kan sawi.
7. Kan kal chhuah dawna kan member min thlahliamtu te, kan cham chhunga min tawngtaipuitu te leh kan hawna min lo hmuaktu zawng zawngte chungah lawmthu kan sawi.
8. Kan kalna tur bus min hmantirtu Pu Maenga, Republic Vengthlang chungah lawmthu kan sawi.