Bial KTP Conference tluang taka neih a ni

    Republic Veng Bial KTP Conference vawi 26-na chu Republic Vengthlang Kohhran Biak Inah Dt. 21-23 January, 2011 chhung khan neih a ni. Kumin hian Conf. Thupui atana "Malsawmna ni ang che" (Gen. 12:2) tih chu thupui hlawm 4-ah then a ni a, thupui hi Pro.Pastor Lalhmangaiha, Pu R. Lalpianzuia, Pu H. Lalrinmawia leh Pu Lalhmunsanga ten an sawi a ni.

    Conference tan zanah Branch tin leh Bial report te ngaihthlak a ni a, tin, hemi zan hian Bial Silver Jubilee puala Audio Album buatsaih chu Bialtu Pastor Rev. R.C.lalnghakliana'n a tlangzarh bawk. Inrinni chawhma lamah rorel inkhawm neih a ni a, General Agenda 7 lut te a zavaiin passed vek a ni a, chungte chu -

1.  Bial KTP hmingin Presbyterian Hospital-ah thilpek pek ni rawh se.

2.  Kan Bial chhunga Branch te intlawh Programme Bial KTP-in siam rawh se.

3.  Bial huapin 'Zu leh Kristiante' tih thupui zirho hi rawh se.

4.  KTP General Conference Hla Bu ah hian member nawlpuiin kan sak tlan theih tur hla te chauh dah thin ni rawh se.  (Hei hi Central KTP Committee-a thlen tur a ni)

5.  Bial Zaipawl member te hi Bial Inkhawmpui zawhah ruat thar thin ni rawh se. (Kum hmasa lamah te chuan Bial Zaipawl member hi Bial Kohhran Hmeichhe Inkhawmpui - February- zawhah ruat thar thin a ni)

6.  Bial huapin Presbyterian kalphung zirho ni rawh se.

7.  Bial KTP hminga Missionary pathum kan chawm mek hi chawm chhunzawm ni rawh se.

    Kumin 2011 chhunga Bial KTP hruaitu tur mi paruk than chhuah an ni a, hetiang hian an post chelh turte an insiamrem nghal a ni -

Leader               -  Pu Lalhmunsanga,  Republic Vengthlang

Asst. Leader      -  Pu David Zohmangaiha,  Republic Veng

Secretary           -  Pu Lalnilena,  Republic Veng

Asst. Secy.        -  Pu K. Lallungawia,  Upper Republic

Treasurer           -  Pu S. Lalnunpuia,  Republic Vengthlang

Finance Secy.    -  Pu Lalchangliana,  Upper Republic

    Inrinni chawhnu hian 'Information technology leh Kristian thalaite' tih thupui zirho a ni a, he huna Resource Person hi Pu C. Lalhmachhuana, DGM, BSNL a ni a, sawihona hun te hmangin kan hun hman te a hlawk thlak kan ti hle. Inrinni zan atangin Conf. thupui (sermon) ngaihthlak a ni a, tin, Inrinni zan inkhawm banah te, Pathianni tlai leh zan inkhawm banah te Fellowship hun hlimawm tak kan hmangho a ni.