Sermon (Thalai aw, 1st May 2011 issue)

Thlarau hruaia awm

‘Amaherawh chu tupawh Krista thlarau nei lo chu Amaha mi a ni lo.’ (Rom 8:9)

Zothantluangi, Johana Group

Israel fate chanchin kan chhiar chuan, Aigupta ram atanga Pathianin a hruai chhuah thu te, Kanan rama ropui taka ram a dinsak thu leh a hnua sala an tan dante pawh kan hre awm e. Heng zawng zawnga chiang taka thil pakhat lo lang chu - Israel fate hi Pathian laka hel hmang tak an ni tih hi a ni. Pathianin thilmak ropui tak tak a tihsak thin a. Mahse hun a lo kal chuan chung a tihsak zawng zawngte chu theihnghilh lo mah se, Pathian tana inserh thianghlim harsa an ti telh telh a, thil dangin an rilru leh ngaihtuahna a hip na telh telh a, a tawpah milem Pathian nen an chawhpawlh leh ta mai thin a ni.

Kan ram Kristian nun leh mahni nun theuh pawh hi inen ila, Israel hnam ang tho hi kan ni awm e. Mizo chu ‘Za a za Kristian kan ni’ tiin kan inchhuang em em a. ‘Lalpa chu ka Pathian a ni’ ti reng chung si hian amah zui tak tak te chu harsa kan ti em em a. A chhandamna changa piangthar te lah hian zu leh ruihhloah kan tluksan fo a, mipat hmeichhiatnaah lah kan insum thei hek lo. Mi tam tak phei hi chuan sum leh pai hi kan pathian ta berin a lang. Khawvel mite nena danglam tura koh hran zinga serh hran rawngbawltute ngei pawh a chunga kan sawi takah te khian kan insum thei bik lova, kan mualpho ta fo a nih hi.

Kan chenna khawvel hi danglam thin mahse, Israelte Pathian, kan Pathian hi a la ngai reng a, a thupek pawh a la ngai reng a ni. Min hmangaih em avangin Amah kan hmangaih let ve hi a phut tlat a, kan taksa, rilru leh thlarau hi a duh a ni. A aw ngaithlaa a thlarau hruaia awm reng turin min duh a ni. Thlarau hruainaah chuan ringtu chuan a duhzawng leh chak zawngte, a pianpui mizia nen lam kalsan a ngai thin. Pathian duhzawng tihpuitlin nan a peih emaw peih lo emaw a tul apiang a tih a ngai tawh thin.  Lalpa hmangaihte chu a hmangaih ve a ngai tawh a, a ngaihtuah ngai loh ni mahse, Lalpa ram zauh hna thawh chu a thahnem ngaihna tur lian tak a lo ni tawh thin.

Kohhrana rawngbawlna peng hrang hranga kan mawhphurhna te hi hlen chhuak vekin, inkhawm te, hnatlang leh committee zawng zawng te hi ti vek mah ila, thlarau hruaina hnuaia tih a nih si loh chuan Pathian tan chuan rimchhia a ni tho ang. Kan Pathian hi a duhtui a, Amah tihna tel lo inthawina ai chuan thuawihna a duhzia pawh Bible-ah kan hmu.

Hun rei tak rawngbawlna a lo inhmang tawh tan phei chuan thlarau hruaina aw laka beng lo chhut ngawng mai hi a awl thin. ‘Ti ve tawh, hre ve tawh’ ni a inhriatna kan lo nei a, chu chuan thinlungah chapona a rawn tuh a, Pathian rawn lova, mahni ngaihdan kal tlangpui ngutnaah min hruai lut thin. Hei hian mahni duhtawk chin chiaha rawngbawl tumnaah min hruai lut a, chu chu kan nunah, kan tawngkam leh kan rawngbawlnaah a lo lang chhuak thin.  Rawngbawlpuite zingah ei loh kan nei a, chhandamna changa piangthar te hmel pawhin thinlung a khawi che zo tawh thin lo. Mahni tha leh tling tawk ni a inngaihna atang chuan thlarau hruaiin a awm theih lova, rawngbawlna a nung thei lo a ni.

Kan nun chhungril a hlim loh chhan te, thil tha lo a ni tih kan hriat kan tih leh mai thin nachhan te hi thlarau hruaia kan awm loh vang pawh a lo ni reng thei. Pathian thlarau chuan a hmasa berin hmangaihna, a dawtah beiseina leh zalenna a pe si thin a.

Israel fate anga thununna kan tawh hma hian kan dinhmun i inenfiah ang u. He khawvelah thil chi hrang hrangin thlarau hruaia kan awmna tur min lo dal mai thei. Mahse, chung kan chaklohna zawng zawng chu Pathian min mamawh tirtu an nih avangin, ‘Ka  chak loh apiangin a ni ka chak thin ni’ kan lo ti thei tawh ang. Kan khawhmuh nan mit a pawimawh angin, Kristian khawhmuh nan hian thlarau thianghlim aw hi a pawimawh em em si.

Thlarau thianghlim hruaia kan awm theih nan LALPA’N  mal min sawm rawh se.