Tu nge ropui ber?“Nimahsela, kawngah chuan, ‘Kan zingah tunge ropui ber ang?’ tiin an lo inhnial tawh avangin an ngawi ta reng a...” Marka 9:33-37
C. Rosangzuala (ATC), Matthaia Group
Ropui ber nih tum hian he khawvelah hian mi tam tak an lo intlansiak tawh thin a. Alexander the Great te, Genghis Khan te, Hitler-a te leh midang tam tak te pawhin khawvela ropui ber nih tumin midang, anmahni aia chak lo zawk, thil tithei lo zawk te rapbetin he khawvel ropuina hi neih an lo tum thin. Chak lo zawkte hnuaichhiah leh rapbet a, engmah tithei lova siam a, chumi atanga mahni inchawisan hi khawvel mite’n ropuina an lo zawn dan a ni.
Ropui ber nih duhna hian mihring rilru hi a khat liam hneh hle a ni ang. Sigmund Freud-a chuan, ‘Thil kan tih reng reng chhan lian ber chu hmingthanna, ropuina kan duh vang a ni,’ a lo ti a. Mi tinin kan duh, hriselna te, ei leh in tur te, sum te, sumin a lei theih thil te, kan chhungkaw nun nawmna tur te, thil dang tam takte hi eng emaw chen chu kan nei thei a, kan nei bawk reng a. Thil pakhat erawh chu eng lai maha khawp khama kan neih leh kan hmuh ngai loh a awm. Chu chu Dr. Freud-a’n ‘hmingthan leh ropui duhna’ a ti a. Prof. William Dewey chuan, ‘mi pawimawh nih duhna’ a lo ti ve bawk. He mi rilru avang pawh hi a ni mahna Isua zirtirte pawh kha Kapernaum an panna kawngah khan ‘Tu nge ropui ber?’ tiin an inhnial!
Kan chang thlan hi chanchintha bu hmasa pathum te hian an ziak kim vek a. Chanchintha Marka ziakah chuan bung 9:33-37-ah kan hmu a, Matthaia ziakah chuan bung18:1-5, Luka ziakah bung 9:46-48-ah te kan hmu a ni. He thu hi Chanchintha Marka ziakah chuan Lal Isuan Ama hnungzuitu nihna kawnga a vawihnih zirtirnaah kan hmu a. Marka leh Luka ten hemi chungchang an sawi dan hi a inzul hle a, Matthaia erawh hi chu a dang deuh niin a lang. Matthaia ziakah hi chuan entirna atan Isuan ‘naupang’ a hman hi ‘inngaihtlawmna’ entirna tia hrilhfiah thin a ni tlangpui a; ni ngei pawhin a lang.
Marka ziak bikah hi chuan ‘naupang’ hi ‘rilru thianghlimna’ emaw ‘inngaihtlawmna’ entirna ai mah chuan mi hnuaihnung, puih ngai, mi chak lo, midangte hnena lawmman leh thil ropui engmah pek let tur nei lo te sawina niin a lang a. Heti laia Lal Isuan a sawi tum ber nia lang ta chu Ama hming avanga heng mi hnuaihnung leh chaklo zawkte chunga phut let leh lawmman beisei lova that chhuahtute hi mi ropui berte an ni tih hi a ni.
Kan tunlai khawvel hi han thlir ila, mihring hlutna leh dinhmun chu a thil lei theih zat atanga teh a ni ber tawh a. Pawisa ngah leh bungraw tha nei te chu mi ropui ti a kan sawi leh zah kai ber berte an ni ta. Midangte aia ropui kan tumna kawngah hian mahni hmasialna leh midangte pawisaklohnain kan mimal leh khawtlang nun a hneh tawh hle naah hian keini ringtute hi rawngbawl tura chhandam kan ni. Kan hlawkna leh lawmman kan hmuh lohna turah chuan mi dangte tana inpek hi thil har tawh tak a nih lai hian, hlawkna um lova midangte tana kan nun, hun leh thil neihte pek leh hlan hi kan rawngbawlna tur leh Lal Isuan Ama hnungzuina kawnga nun ropui a tih chu a lo ni si.
Hei hi Lal Isuan a zirtirte a zirtir, chanchintha ziaktute kal tlanga min zirtir a ni a. Chuvangin, kan tunlai khawvelah chuan thil har tak ni mah sela kan ni tin nunah, hna kan thawhnaah, thian kan kawmnaah, hausa leh rethei thliar lovin, kan tana hlawkna tur pawh awm lo mah sela mi hnuaihnung zawkte rawngbawl sak tura kan lo inpek tawhna hi chhunzawm zelin, theihtawp chhuahin rawng i bawl zel ang u.
Lalpan a thu malsawm rawh se.
No comments:
Post a Comment